AZƏRBAYCAN SƏFİRİ İNDONEZİYA KONSTİTUSİYA MƏHKƏMƏSİNİN YENİ SEÇİLMİŞ SƏDRİ İLƏ GÖRÜŞMÜŞDÜR
AZƏRTAC xəbər verir ki, Azərbaycanın İndoneziyadakı səfiri İbrahim Hacıyev İndoneziya Konstitusiya Məhkəməsinin yeni seçilmiş sədri Mohammad Mahfud ilə görüşmüşdür.
Səfirlikdən bildirmişlər ki, İ.Hacıyev Mohammad Mahfudu Konstitusiya Məhkəməsinin sədri seçilməsi və müqəddəs Ramazan bayramı münasibətilə təbrik etmiş, Azərbaycanın Konstitusiya Məhkəməsinin sədri Fərhad Abdullayevin təbrik məktubunu ona təqdim etmişdir.
Mohammad Mahfud təbrik məktubuna görə minnətdarlığını F.Abdullayevə çatdırmağı xahiş etmişdir.
Azərbaycan tərəfinin əməkdaşlıq barədə təklifini dəstəklədiyini bildirən Mohammad Mahfud, Azərbaycan Konstitusiya Məhkəməsinin digər ölkələrlə əlaqələri genişləndirmək səylərini yüksək qiymətləndirmiş, ölkələrimizin Konstitusiya məhkəmələri sədrlərinin qarşılıqlı səfərlərinin vacibliyinə toxunaraq, ölkəmizə səfər edəcəyini söyləmişdir.
Azərbaycan Konstitusiya Məhkəməsinin sədrini İndoneziyada səfərə dəvət edəcəyini bildirən M.Mahfud Konstitusiya məhkəmələrinin ölkələrdə insan hüquqlarının qorunması, demokratiyanın inkişafında vacib rol oynadıqlarını qeyd etmişdir.
İ.Hacıyev son illər dünyanın ən dinamik inkişaf edən dövləti olan Azərbaycanda bütün sahələrdə qazanılan uğurlardan, respublikamızın regionun lider ölkəsinə çevrilməsindən, regional və beynəlxalq layihələrin həyata keçirilməsində, bölgədə sülh və sabitliyin qorunub saxlanılmasında vacib rolundan danışmışdır.
Sonda Mohammad Mahfuda Azərbaycan haqqında ingilis və İndoneziya dillərində nəşr edilmiş kitablar hədiyyə edilmişdir.
Bölmənin digər xəbərləri
