Azərbaycan Şərqlə Qərbi birləşdirən mühüm tranzit mərkəzə çevrilib ŞƏRH
Bakı, 3 sentyabr, AZƏRTAC
Azərbaycan və Çin arasında diplomatik münasibətlər müasir beynəlxalq sistemdə qarşılıqlı hörmət, bərabərlik və strateji tərəfdaşlıq prinsipləri üzərində inkişaf edir. İkitərəfli əlaqələrin əsası enerji, nəqliyyat, infrastruktur, kənd təsərrüfatı və texnologiya sahələrində atılmış mühüm addımlarla daha da möhkəmlənir. Xüsusilə də “Bir kəmər, bir yol” təşəbbüsü çərçivəsində Azərbaycan Şərq ilə Qərbi birləşdirən mühüm tranzit mərkəzlərindən birinə çevrilib. Prezident İlham Əliyev dəfələrlə vurğulayıb ki, Azərbaycan-Çin münasibətləri yalnız iqtisadi deyil, həm də siyasi müstəvidə strateji əhəmiyyət daşıyır.
AZƏRTAC xəbər verir ki, bu sözləri Milli Məclisin deputatı Səttar Möhbalıyev deyib.
Fikirlərini davam etdirən deputat bildirib ki, Azərbaycan beynəlxalq arenada müstəqil siyasət yürüdür və hər bir tərəfdaşla münasibətlərini qarşılıqlı fayda prinsipi əsasında qurur. Çinlə əməkdaşlığımız bu baxımdan xüsusi yer tutur. Sentyabrın 1-də Çinin Tiencin şəhərində keçirilən “ŞƏT plyus” formatlı görüşdə Prezident İlham Əliyev Çin-Azərbaycan münasibətlərinin yeni mərhələyə qədəm qoyduğunu vurğulayan mühüm fikir söylədi: “Son iki ildə əlaqələrimiz keyfiyyətcə yeni səviyyəyə yüksəlib. Ötən il Astanada keçirilmiş ŞƏT Sammiti çərçivəsində biz strateji tərəfdaşlıq qurduq. Bu il mənim Çinə dövlət səfərim zamanı hərtərəfli strateji tərəfdaşlıq münasibətlərinin təsis edilməsi barədə Birgə Bəyanat imzalandı. Bu tarixi hadisə Azərbaycan-Çin münasibətlərində yeni bir səhifə açdı”.
Dövlətimizin başçısının bu sitatını Azərbaycanın regionda oynadığı geostrateji rola dair açıq mesaj kimi dəyərləndirən Səttar Möhbalıyev hesab edir ki, “hərtərəfli strateji tərəfdaşlıq” statusunun təsis edilməsi əlaqələrin ikitərəfli əməkdaşlıq çərçivəsindən çıxaraq strateji blok səviyyəsinə keçirilməsinə şərait yaradır. Çin-Azərbaycan münasibətləri artıq yalnız iqtisadi deyil, həm də geosiyasi müstəvidə yenidən formalaşır, qlobal təşəbbüslərə qətiyyətli dəstək olur. Prezident İlham Əliyev çıxışında qeyd etdi: “Azərbaycan beynəlxalq sülhün, təhlükəsizliyin və inkişafın təşviqi məqsədilə Çin tərəfindən irəli sürülmüş Qlobal İnkişaf Təşəbbüsünü, Qlobal Təhlükəsizlik Təşəbbüsünü və Qlobal Sivilizasiya Təşəbbüsünü fəal şəkildə dəstəkləmişdir. Biz, həmçinin Çin Xalq Respublikasının Sədri tərəfindən irəli sürülmüş Qlobal İdarəetmə Təşəbbüsünü dövlətlərin suveren bərabərliyi, BMT Nizamnaməsi və beynəlxalq hüquqa hörmət əsasında beynəlxalq münasibətlərin yaxşılaşdırılmasına yönəlmiş mühüm və vaxtında atılmış bir addım kimi alqışlayırıq”. Bu, Azərbaycanın dünya siyasi sistemində çoxtərəfli diplomatik qurumlarla inteqrasiyasının göstəricisidir. Çıxışda qeyd olunan statistik göstəricilər isə daha böyük mətləblərdən xəbər verir: “2022-ci ildən bəri Orta Dəhliz üzrə Azərbaycan vasitəsilə yükdaşımaların həcmi təxminən 90 faiz artıb. Yüklərin bu dəhliz üzrə keçid müddəti əhəmiyyətli dərəcədə azalıb”.
Deputatın sözlərinə görə, artıq siyasi dairələr başa düşür ki, bu çıxışla Azərbaycan həm Çin, həm ŞƏT, həm də qlobal diplomatik platformalarla çoxtərəfli əməkdaşlığını gücləndirir. Bu strategiya ölkəmizin sabitlik, etibarlılıq və güc mərkəzi kimi imicini möhkəmləndirir. Prezident İlham Əliyevin çıxışı ilə qeyd edilən mesajlar Çinlə strateji tərəfdaşlığın yeni səviyyədə olduğunu, Azərbaycanın Qlobal təşəbbüslərə aktiv dəstək verdiyini, nəqliyyat-logistika infrastrukturu ilə Avrasiyada mövqeyini qoruduğunu, “Bir kəmər, bir yol”a əməli münasibətini və çoxistiqamətli diplomatik balansı çox aydın şəkildə göstərir.
Bölmənin digər xəbərləri
