Azərbaycan tarixinə qızıl hərflərlə həkk olunmuş bir Zəfərin təcəssümü ŞƏRH
Bakı, 20 sentyabr, AZƏRTAC
Prezident İlham Əliyevin Sərəncamı ilə sentyabrın 20-si Azərbaycan Respublikasında Dövlət Suverenliyi Günü elan edilib. Məlumdur ki, 2023-cü il sentyabrın 19-da Azərbaycanın Qarabağ iqtisadi rayonunda törədilən genişmiqyaslı təxribatların qarşısının alınması və Ermənistan silahlı qüvvələrinin tör-töküntülərinin tərk-silah edilərək torpaqlarımızdan çıxarılması, həmin ərazilərdə Azərbaycan Respublikası Konstitusiya quruluşunun bərpa edilməsi məqsədilə antiterror əməliyyatına başlanıldı. Cəmi 23 saat davam edən və sentyabrın 20-də başa çatmış əməliyyat nəticəsində rəşadətli Azərbaycan Ordusu qarşısına qoyulmuş bütün vəzifələri yüksək peşəkarlıqla yerinə yetirdi. Beləliklə, növbəti qələbə nəticəsində Azərbaycan Respublikasının suverenliyi tam bərpa edildi. Azərbaycan tarixində müstəsna əhəmiyyət kəsb edən şanlı Zəfərimiz sayəsində bu gün Dövlət Bayrağımız suverenliyimizin bərqərar olduğu bütün ərazilərdə əzəmətlə dalğalanmaqdadır.
Bu fikirləri AZƏRTAC-a açıqlamasında Bakı Dövlət Universitetinin (BDU) Beynəlxalq münasibətlər və iqtisadiyyat fakültəsinin müəllimi, politoloq Sultan Zahidov söyləyib.
O bildirib ki, antiterror tədbirlərinin həyata keçirilməsində məqsəd üçtərəfli Bəyanatın müddəalarının yerinə yetirilməsini təmin etmək, Qarabağdakı qeyri-qanuni silahlı qüvvələrin tərk-silah olunaraq çıxarılmasına nail olmaq idi. Bu əməliyyatın keçirilməsi, həmçinin Azərbaycanın mülki və hərbi şəxslərinə qarşı təxribatların qarşısını almaqla bərabər, Qarabağda yaşayan erməniəsilli sakinləri qondarma xunta rejiminin zülmündən xilas etmək və Azərbaycanın konstitusiya quruluşunun bərpa edilməsinə xidmət edirdi.
“Lokal xarakterli antiterror tədbirlərini doğuran səbəblər İkinci Qarabağ müharibəsindən ötən son üç il ərzində Ermənistan tərəfindən Azərbaycana qarşı pozuculuq fəaliyyətlərinin artması, sülh prosesinin bilərəkdən yubadılması, Qarabağ regionunda davamlı olaraq hərbi təxribatların həyata keçirilməsi və ən əsası qeyri-qanuni separatçı-cinayətkar rejimin Xankəndidə oturması idi. Bundan başqa, həmin dönəmdə Azərbaycan ərazilərində qeyri-qanuni yerləşdirilmiş 10 min silahlıya maliyyə, hərbi, texniki yardımın göstərilməsi, ərazilərimizin minalanmasının davam etdirilməsini, Azərbaycanın və xarici ölkələrin mülki təyyarələrinə qarşı radio-elektron müdaxilə hallarının həyata keçirilməsini də antiterror tədbirlərini zəruri edən səbəblər sırasında qeyd etmək olar. Bütün bu baş verənlərə əlavə olaraq, ölkəmizə qarşı “blokada”, “humanitar böhran” kimi əsassız iddialarla çıxış edən Ermənistanın dəstəklədiyi qondarma separatçı rejimin Azərbaycan ərazisində qeyri-qanuni “prezident seçkiləri” həyata keçirməsi ölkəmiz tərəfindən müvafiq cavab tədbirləri görülməsini zəruri edirdi. Qarşı tərəfin sentyabrın 19-da mülki şəxslərin və polis işçilərinin ölümü ilə nəticələnən mina təxribatına əl atması isə bardağı daşıran son damla oldu”, - deyə S.Zahidov qeyd edib.
Politoloq vurğulayıb ki, baş verənlərin fonunda, Azərbaycan daim sülh gündəliyinə sadiqliyini nümayiş etdirmiş və Qarabağdakı erməniəsilli sakinlərin Azərbaycan cəmiyyətinə reinteqrasiyasına nail olmaq üçün çağırışlar etmişdi. Bariz nümunə kimi sentyabrın 19-da Azərbaycan Respublikasının Prezident Administrasiyası növbəti dəfə erməniəsilli sakinlərə çağırış edərək, onları Yevlaxda reinteqrasiya prosesini müzakirəyə dəvət etməsini göstərə bilərik. Bununla belə, Qarabağdakı qondarma cinayətkar rejim bu prosesə hər vasitə ilə maneçilik törətməyə çalışaraq, oradakı erməniəsilli sakinləri qul kimi istismar etdiklərini nümayiş etdirirdilər.
Azərbaycanın heç bir halda öz ərazisində boz zonanın mövcudluğuna izn verməyəcəyini qeyd edən S.Zahidov deyib: “Məhz bu səbəbdən dövlətin suverenliyinin və konstitusional quruluşunun təmini üçün antiterror tədbirlərinin həyata keçirilməsi artıq zərurətə çevrilmişdi. Qeyd etmək lazımdır ki, Azərbaycan Ordusu bu antiterror tədbirlərinin gedişində beynəlxalq humanitar hüququn bütün prinsiplərinə əməl edərək yalnız legitim hərbi obyektləri, silah anbarlarını, düşmənin hərbi texnikasını və hərbi infrastrukturunu hədəfə aldı. Ermənistanın qeyri-qanuni silahlı qüvvələri isə, bunun əksinə olaraq, bütün beynəlxalq normaları çeynəyərək Azərbaycan Silahlı Qüvvələri bölmələrinin hədəfindən yayınmaq məqsədilə müxtəlif təyinatlı zirehli döyüş texnikası və atəş vasitələrini yaşayış məntəqələrində yerləşdirmiş, eyni zamanda, hərbi təyinatlı obyektlərə mülki şəxsləri cəlb etmişdi”.
Politoloq vurğulayıb ki, 2023-cü ilin sentyabrın 20-si Azərbaycan tarixinə qızıl hərflərlə həkk olunmuş bir Zəfərin təcəssümüdür. Bu tarixi hadisə yalnız Azərbaycanın suverenliyinin bərqərar edilməsini deyil, həm də iki yüz ildən çox tarixə malik erməni separatizminin bölgədən tamamilə silinib təmizlənməsini, xalqımıza qarşı böyük cinayətlər işləmiş separatçı rejimin əliqanlı rəhbərlərinin həbs olunmasını əks etdirir. Əgər İkinci Qarabağ müharibəsi nəticəsində Azərbaycan Bayrağı Şuşa, Cəbrayıl, Ağdam, Kəlbəcər, Laçın, Füzuli, Qubadlı və Zəngilanda dalğalanmağa başladısa da, 2023-cü ilin sentyabrın 19-20-də baş tutan antiterror tədbirləri nəticəsində bu gün üçrəngli bayrağımız Xankəndi, Xocalı, Xocavənd, Ağdərə və Əsgəranda dalğalanır.
“Nəticədə, cari il fevralın 7-də ölkəmizdə keçirilən prezident seçkiləri bütöv Azərbaycanın bütün ərazilərində həyata keçirildi. Bu seçkilərdə qələbə qazanan Prezident İlham Əliyevin inauqurasiya mərasimində də qeyd etdiyi kimi, onun Xankəndi şəhərində seçki qutusuna atdığı bülleten bölgədəki erməni separatizminin tabutuna vurulan sonuncu mismar oldu”, - deyə Sultan Zahidov bildirib.
Bölmənin digər xəbərləri
