Azərbaycan TDT-nin institutlaşmasına və beynəlxalq nüfuzunun artmasına mühüm töhfə verir- ŞƏRH
Bakı, 17 may, AZƏRTAC
Azərbaycan–Qazaxıstan münasibətləri bu gün yüksək səviyyədə inkişaf edir və dövlət başçılarının qarşılıqlı səfərlərinin intensivləşməsi xalqlarımızı və ölkələrimizi bir-birinə daha da yaxınlaşdırır. Türk Dövlətləri Təşkilatında (TDT) qeyri-rəsmi sammitlərin keçirilməsi ənənəsi Azərbaycanın bu təşkilatın institutlaşmasına və beynəlxalq nüfuzunun artmasına verdiyi mühüm töhfənin göstəricisidir.
Bu sözləri AZƏRTAC-a açıqlamasında Milli Məclisin İqtisadi siyasət, sənaye və sahibkarlıq komitəsi sədrinin müavini Azər Badamov söyləyib.
O bildirib ki, Türküstan şəhəri qədim tarixi-mədəni irsə malik mühüm mərkəzlərdən biridir. İlk dəfə Şuşada keçirilən qeyri-rəsmi Zirvə görüşünün indi Türküstanda davam etdirilməsi dövlət başçılarının sammitləri paytaxtlardan kənar şəhərlərdə keçirmək ənənəsinin formalaşmasına da xidmət edir.
Azərbaycan beynəlxalq tədbirlər çərçivəsində TDT-nin rolunun gücləndirilməsinə xüsusi diqqət yetirir. Bakıda keçirilən BMT-nin Ümumdünya Şəhərsalma Forumunun 13-cü Sessiyası çərçivəsində Türk Dövlətləri Təşkilatının şəhərsalma üzrə yüksəksəviyyəli dialoqunun təşkili bunun bariz nümunəsidir. Azərbaycan türk xalqlarının elmi, mədəni və tarixi irsinə böyük dəyər verir. İyun ayında Bakıda keçiriləcək Türk Dünyası Həftəsi çərçivəsində Birinci Türkoloji Qurultayın 100 illiyinin qeyd olunması da tarixi-mədəni irsimizə göstərilən yüksək ehtiramın ifadəsidir. Bu tədbir türk mənşəli xalqların mədəni həyatında mühüm və əlamətdar hadisə olacaq. Belə təşəbbüslər tarixi keçmişimizin öyrənilməsi, adət-ənənələrimizin və mədəni irsimizin gələcək nəsillərə çatdırılması baxımından böyük əhəmiyyət daşıyır.
“Türküstan şəhərində keçirilən TDT Dövlət başçılarının qeyri-rəsmi Zirvə görüşünün mövzusunun süni intellekt və rəqəmsal texnologiyaların inkişafına həsr olunması xüsusi əhəmiyyət kəsb edir. Müasir dövrdə süni intellekt və rəqəmsal texnologiyalar sahəsini inkişaf etdirmədən qlobal proseslərlə ayaqlaşmaq və yüksək inkişaf göstəricilərinə nail olmaq mümkün deyil. Dövlətimizin başçısı Zirvə görüşündə etdiyi çıxışda Azərbaycanın bu sahədə qazandığı uğurları, gələcəyə baxışını və Orta Dəhlizin inkişafına verdiyi töhfələri xüsusi vurğulayıb. Ümumilikdə Azərbaycan süni intellekt və rəqəmsal texnologiyaların iqtisadiyyata tətbiqini prioritet istiqamət elan edib. Rəqəmsal İnkişaf Şurasının, Milli Süni İntellekt Mərkəzinin və Süni İntellekt Akademiyasının yaradılması ölkəmizin rəqəmsal transformasiya prosesinin sürətlənməsinə mühüm töhfə verəcək. Bu gün Azərbaycan fiber-optik kabel şəbəkəsi vasitəsilə 100 faiz genişzolaqlı internetlə təmin olunmuş ölkələrdən biridir. Bununla yanaşı, süni intellektin müsbət tərəfləri ilə yanaşı, mümkün mənfi təsirlərindən qorunmaq məqsədilə də mühüm addımlar atılır. Hüquqi bazanın formalaşdırılması, kibertəhlükəsizlik sahəsində xüsusi qurumların yaradılması və qanunvericilik təşəbbüsləri bu istiqamətdə görülən işlərin əsas tərkib hissəsidir”, - deyə A.Badamov vurğulayıb.
Deputat əlavə edib ki, Azərbaycan rəqəmsal inkişaf sahəsində türk dövlətləri ilə də uğurlu əməkdaşlıq qurub. Hazırda ölkəmizin ərazisindən yeni rəqəmsal dəhliz keçir. Azərbaycan ilə Qazaxıstan arasında Xəzər dənizinin dibi ilə fiber-optik kabel xəttinin çəkilməsi Trans-Xəzər Fiber-Optik Kabel Layihəsinin həyata keçirilməsinə və Avropa ilə Asiya arasında Rəqəmsal İpək Yolunun formalaşmasına yeni imkanlar açacaq. Azərbaycan isə bu strateji dəhlizin mərkəzində yerləşəcək. Bundan əlavə, rəqəmsal dəhlizin Zəngəzur dəhlizi üzərindən keçməsi Orta Dəhlizin imkanlarını daha da genişləndirəcək. Elektronlaşmanın geniş tətbiqi Orta Dəhlizdə keçid sürətinin artmasına və gömrük prosedurlarının sadələşdirilməsinə yeni imkanlar yaradır.
O deyib: “Azərbaycan TDT-nin beynəlxalq təşkilat kimi güclənməsinə və üzv dövlətlər arasında inteqrasiyanın sürətlənməsinə mühüm töhfələr verməyə davam edir. Prezident İlham Əliyevin TDT ilə bağlı səsləndirdiyi fikirlər artıq Türk dünyasını birləşdirən mühüm çağırışa çevrilib: “Bu, bizim üçün əsas beynəlxalq təşkilatdır, çünki bu, bizim ailəmizdir. Bizim başqa ailəmiz yoxdur. Bizim ailəmiz Türk dünyasıdır”.
Bölmənin digər xəbərləri
