“Azərbaycan Tələbə Şəbəkəsi” Berlində 20 Yanvar faciəsinə həsr olunmuş tədbir keçirmişdir
Berlin, 21 yanvar (AZƏRTAC). “Azerbaijan Student Network e.V.” (ASN) və Almaniyadakı Azərbaycanlıların Koordinasiya Mərkəzinin (AAKM) birgə təşkilatçılığı ilə Berlin şəhərində 20 Yanvar şəhidlərinin xatirəsinə həsr olunmuş tədbir həyata keçirilmişdir.
Tədbirdə bir çox millətlərin nümayəndələri, xüsusən tələbələr, ictimai təşkilatların üzvləri, alim və diplomatlar iştirak etmişlər.
Tədbirin keçirildiyi zal Qara Yanvar günündə şəhid olmuş soydaşlarımızın rəsmləri və qərənfillərlə bəzədilmişdi.
AAKM-in icraçı direktoru Samirə Patser-İsmayılova, ASN-in baş katibi Elşən İsmayılov hadisə ilə bağlı fikirlərini bölüşmüşlər. Onlar gəncləri birliyə səsləmiş, sülh və əmin-amanlıq şəraitində yaşamağı arzulamışlar.
Tədbirdə faciə ilə bağlı sənədli film nümayiş etdirilmişdir.
Daha sonra məşhur alman iqtisadçısı, professor Fürmann 20 Yanvar hadisəsi ilə bağlı seminar keçirmişdir.
Azərbaycan və Cənubi Qafqaz tarixi üzrə ekspert sayılan Fürmann baş verənləri həm siyasi, həm də iqtisadi və tarixi baxımdan şərh etmişdir.
İştirakçılar və qonaqlar Fürmanna 20 Yanvar faciəsi ilə bağlı suallar ünvanlamışlar. Əsas müzakirə mövzusu Avropa ölkələrinin, xüsusilə alman ictimaiyyətinin və mediasının bu məsələyə laqeyd münasibəti olmuşdur.
Rəsmi hissədən sonra təşkilatçılar tərəfindən ehsan süfrəsi açılmışdır.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
