Bakı, 30 aprel, AZƏRTAC

Dövlətlər arasında münasibətlərin qurulmasında, inkişafında şəxsiyyətlərin, liderlərin rolu danılmazdır. Bu gün Türkiyə ilə Azərbaycan arasında münasibətlərin inkişafı tarixdə ən yüksək səviyyəyə çatıb. Həmin inkişafda xalqların, dövlətlərin əlaqələri ilə yanaşı, hər iki ölkə rəhbərinin səmimi, qardaşlıq münasibətləri də əsas amil kimi çıxış edir. Liderlər arasındakı əlaqələrin yüksək statusu hər iki ölkənin maraqlarının birləşməsini, vahid platformada həyata keçirilməsini şərtləndirir. Əlbəttə, bütün bunlar Ümummilli Liderin əsasını qoyduğu “Bir millət, iki dövlət” konsepsiyasının tərkib hissələridir.

Bu fikirləri AZƏRTAC-a açıqlamasında Ana Vətən Partiyası sədrinin müavini politoloq Yalçın Hacızadə söyləyib.

Prezident İlham Əliyevin bu ilin dörd ayında qardaş ölkəyə üç dəfə səfər etdiyini diqqətə çatdıran politoloq deyib: "Dövlətimizin başçısının son səfəri zamanı “TEKNOFEST” festivalında iştirakı və Türkiyə, onun Prezidenti Rəcəb Tayyib Ərdoğan haqqında söylədikləri münasibətlərin inkişafının göstəricisidir. Türkiyə-Azərbaycan münasibətləri yarıkonfederasiya halına gətirilib, hər bir ölkənin uğuru və kədəri digərində də açıq şəkildə hiss olunur. Türkiyədə istehsal edilən hərbi sənaye məhsullarının dərhal Azərbaycana inteqrasiya edilməsi, İkinci Qarabağ müharibəsində ölkəmizə verilən dəstək, qardaş ölkədə baş verən təbii fəlakətlərin nəticələrinin aradan qaldırılmasında Azərbaycanın oynadığı rol hər iki ölkənin xalqlarını və dövlətlərini daha möhkəm birləşdirir. Əlbəttə, bütün bunlar bizlərə qarşı olan qüvvələri də çox narahat edir. Prezident İlham Əliyevin “TEKNOFEST”də iştirakı həm Rəcəb Tayyib Ərdoğana, həm də Türkiyəyə böyük dəstək nümayişi idi".

Y.Hacızadə bildirib ki, Türkiyədə keçiriləcək seçkilər təkcə həmin ölkə üçün deyil, bütün Türk dünyası, region ölkələri üçün çox vacibdir. Sirr deyil ki, Rəcəb Tayyib Ərdoğanın yenidən prezident seçilməsi bizim üçün də çox əhəmiyyətlidir. Çünki bu gün Türkiyə bu gün beynəlxalq müstəvidə Azərbaycana qarşı olan qüvvələrin qarşısında böyük səddir.

“Azərbaycanın dövlət başçısı “TEKNOFEST”dəki çıxışında Türkiyənin hərbi sənayesi ilə bağlı gələcək əməkdaşlıq planlarını da açıqladı. Prezident İlham Əliyevin Azərbaycanda “Bayraktar” mərkəzinin açılmasına, səmalarımızda dünyanın son model hərbi təyyarəsi olan “Kızılelma”nın uçacağına ümidvar olduğunu bildirməsi bizim üçün mühüm, əhəmiyyətli məsələlərdir və gələcəkdə ölkəmizin təhlükəsizliyinin qarantıdır. Eyni zamanda, hər iki ölkə arasında münasibətlərin sürətli inkişafı regionumuzda da sülhün və təhlükəsizliyin qarantıdır", - deyə politoloq qeyd edib.