AZƏRBAYCAN VƏ GÜRCÜSTAN PARLAMENTLƏRİ ARASINDA ƏLAQƏLƏR MÖHKƏMLƏNİR
AZƏRTAC xəbər verir ki, sentyabrın 26-da Milli Məclis sədrinin birinci müavini Ziyafət Əsgərov Azərbaycan qadınlarının III qurultayında iştirak edən Gürcüstan nümayəndə heyətinin üzvləri ilə görüşmüşdür.
Ziyafət Əsgərov yaxın qonşu olan Azərbaycan və Gürcüstan arasında mövcud mehriban dostluq münasibətlərini diqqətə çatdırmış, Gürcüstan parlamentinin insan hüquqları və vətəndaş inteqrasiyası dövlət komitəsi üzvlərinin respublikamıza səfərinin parlamentlərarası əlaqələrimizin inkişafına təkan verəcəyinə əminliyini bildirmişdir.
Gürcüstan parlamentinin insan hüquqları və vətəndaş inteqrasiyası üzrə dövlət komitəsinin sədri Georgi Arsenişvili ölkə parlamentində qəbul edilən qanunlar barədə məlumat vermiş, demokratiya və insan haqları sahəsində görülən tədbirlər haqqında danışmışdır. Gürcüstan dövlətinin orada yaşayan azərbaycanlıların problemlərinə daim həssaslıqla yanaşdığını söyləyən G.Arsenişvili ölkəsi və Rusiya arasında baş vermiş məlum hadisələr zamanı Gürcüstan azərbaycanlılarının gürcü məcburi köçkünlərinə göstərdiyi hərtərəfli köməyi diqqətə çatdırmış, gürcülərin bunu heç zaman unutmayacağını vurğulamışdır. Bildirmişdir ki, xalqlarımız arasında mehriban dostluq əlaqələri bundan sonra da inkişaf edəcəkdir.
Görüşdə Azərbaycanın Gürcüstandakı səfiri Namiq Əliyev iştirak etmişdir.
Bölmənin digər xəbərləri
