Bakı, 29 aprel, AZƏRTAC

Azərbaycan və Türkiyə münasibətləri son 20 il ərzində iki qardaş ölkə arasındakı əlaqələrin ən yüksək səviyyəyə çatmasına, Türk dünyasının birliyinə, bölgədə haqqın və ədalətin bərqərar olmasına xidmət edən böyük və şərəfli yol keçib. Bu gün Azərbaycan-Türkiyə qardaşlığı öz tarixinin yüz illər sonrakı nəsillərin də qürur duyacaqları dövrünü yaşayır.

Bu sözləri AZƏRTAC-a açıqlamasında siyasi ekspert Elçin Mirzəbəyli söyləyib.

Siyasi ekspert vurğulayıb ki, dövlətlərimiz arasındakı əlaqələrin zirvəyə yüksəlməsində, dostluq və qardaşlıq tellərinin daha da möhkəmlənməsində, Ulu Öndər Heydər Əliyevin “Bir millət, iki dövlət” fəlsəfəsinin qarşılıqlı münasibətlərin bütün istiqamətlərinə yansımasında və Türk dünyasını bir araya gətirən sarsılmaz təmələ çevrilməsində liderlərimiz İlham Əliyevin və Rəcəb Tayyib Ərdoğanın tarixi xidmətləri var. Hər iki dövlət başçısının yürütdüyü siyasət, Azərbaycanın və Türkiyənin, eləcə də bütün Türk dünyasının gələcəyi ilə bağlı strateji baxış bucaqlarına malik olması ölkələrimizin və xalqlarımızın firavan, təhlükəsiz həyatının təmin edilməsinə yönəlib.

"Azərbaycan və Türkiyənin, eləcə də prezidentlər İlham Əliyev və Rəcəb Tayyib Ərdoğanın yürütdükləri, uzaq strateji hədəflərə yönəlmiş siyasət Türk dünyasını inkişafa, elmi-texnoloji tərəqqiyə doğru aparır. Azərbaycan Prezidentinin İstanbulda keçirilən “TEKNOFEST” festivalında iştirak etmək üçün qardaş ölkəyə səfəri də təsadüfi deyil. Azərbaycan və Türkiyə sevincli, kədərli günlərdə bir yerdə olduğu kimi, inkişafın, tərəqqinin yollarında da birlikdə addımlayır, gələcəyin Azərbaycanını, Türkiyəsini, Türk dünyasını birlikdə qururlar.

İki il əvvəl Azərbaycan və Türkiyə Şuşa Bəyannaməsini imzalamaqla rəsmən müttəfiq olublar. Prezident İlham Əliyevin “TEKNOFEST” festivalında məhz Şuşa Bəyannaməsinə diqqət çəkməsi təsadüfi deyil. Şuşa Bəyannaməsinin imzalanması Azərbaycan və Türkiyənin, qardaş türk xalqlarının minillik arzularının gerçəkləşməsi, milli iradənin qətiyyətli, uzaqgörən və cəsarətli liderlərimizin səyləri nəticəsində özünü ən yüksək səviyyədə büruzə verməsidir. Şuşa Bəyannaməsi milli iradənin təntənəsi və bütün Türk dünyasının tarixi uğurudur", - deyə E.Mirzəbəyli qeyd edib.

Onun sözlərinə görə, Azərbaycan və Türkiyənin birliyi və qardaşlığı təkcə türk xalqları üçün deyil, bizimlə eyni tarixi, mədəniyyəti, ortaq keçmişi və gələcəyi paylaşan bütün xalqlarının firavan, təhlükəsiz həyatının təminatçısıdır. Harada Azərbaycan və Türkiyə, İlham Əliyev və Rəcəb Tayyib Ərdoğan varsa, orada inkişaf, ədalət və rifah var. Birliyimiz zülmə qarşı sipər, işığa, aydınlığa mehrabdır.

"Ulu Öndər Heydər Əliyevin və Müzəffər Ali Baş Komandamızın dediyi kimi, Azərbaycan və Türkiyə “bir millət, iki dövlət, bir yumruqdur”. Dəmir yumruğumuz haqqa, ədalətə qarşı dayananların başı üzərində, zülmün, şərin qarşısında duranların isə keşiyindədir", - deyə siyasi ekspert bildirib.