Azərbaycan Vilnüsdə “Vivattur-2012” Beynəlxalq sərgisində öz turizm potensialını təqdim edir
Vilnüs, 2 mart (AZƏRTAC). Martın 2-də Vilnüsdə “Vivattur-2012” Beynəlxalq turizm, idman və asudə vaxt sərgisi açılmışdır. Sərgidə dünyanın 17 ölkəsindən 192 turizm şirkəti iştirak edir.
Təntənəli açılış mərasimində Litva iqtisadiyyat nazirinin müavini Dalmantas Latinskas, habelə Dövlət Turizm Departamentinin direktoru Raymonda Balnene iştirak etmişlər. “Vivattur” sərgisi getdikcə daha çox iştirakçı və qonaq cəlb edir. Turizm və fəal idmanla maraqlanan, Litvada və digər ölkələrdə maraqlı vaxt keçirmək istəyən insanların sərgiyə marağı durmadan artır.
Azərbaycanın Mədəniyyət və Turizm Nazirliyinin nümayəndə heyəti ölkəmizin turizm potensialını təqdim etmək üçün Vilnüsdədir. Azərbaycan 25 kvadratmetr sahəni icarəyə götürmüşdür. İngilis və rus dillərində 20 adda mətbu material hazırlanmışdır. Sərginin açıldığı ilk dəqiqələrdən Azərbaycanın pavilyonu böyük maraqla qarşılanmışdır. Sərgiyə gələnlər Azərbaycanın görməli yerləri, hotelləri və turizm obyektləri ilə tanış olurlar.
Açılış mərasimində Litvada akkreditasiya olunmuş diplomatik korpusun nümayəndələri, o cümlədən Azərbaycanın Litvadakı səfiri Həsən Məmmədzadə iştirak etmişlər.
Nigar Hüseynova
AZƏRTAC-ın xüsusi müxbiri
Vilnüs
Bölmənin digər xəbərləri
