AZƏRBAYCANDA BEYNƏLXALQ QAÇIŞ GÜNÜ QEYD OLUNMUŞDUR
Bakı, 22 iyun (AZƏRTAC). İyunun 21-də Azərbaycan Milli Olimpiya Komitəsi Beynəlxalq Olimpiya Qaçış günü münasibətilə yarış keçirmişdir.
İştirakçıların toplaşdıqları Azadlıq meydanı, Dənizkənarı Milli parkı, habelə start, finiş və qaçış məsafələrinin əraziləri bayraq, şüar, emblemlərlə, o cümlədən Olimpiya bayraqları, rəmzləri və Coca-Cola şirkətinin reklam materialları ilə bəzədilmişdi. BMT-nin Baş katibi Pan Gi Munun Olimpiya Qaçış günü münasibətilə Olimpiya Komitəsinə ünvanlandığı məktubu, Beynəlxalq Olimpiya Komitəsinin prezidenti Xuan Antonio Samarançın iştirakçılara müraciəti Azərbaycan, ingilis və rus dillərində səsləndirilmişdir.
Qaçış gününün təntənəli açılış mərasimində Milli Olimpiya Komitəsinin mütəxəssisləri Cəmaləddin Rəhimov, Çingiz Şamilov, Azərbaycan Atletika Federasiyasının nümayəndələri iştirak etmişlər.
Açılış mərasiminin rəsmi hissəsi iştirakçıların paradı ilə başa çatmışdır. Sonra mədəni proqram çərçivəsində mahnı və rəqs ansambllarının, akrobatların, idman kollektivlərinin nümunəvi çıxışları olmuşdur.
Bütün yaş dərəcələrindən olan minə qədər qaçış həvəskarı 10 kilometr məsafəyə marafon yürüşü və 200, 1500 metr məsafələrə qaçış üzrə yarışmışlar. Ən yaşlı iştirakçının 70, ən gənc iştirakçının isə 6 yaşı vardı. Yarışda ilk yerləri tutanlar xüsusi mükafatlar və Beynəlxalq Olimpiya Komitəsinin diplomları ilə təltif olunmuşlar. Ən yaşlı və ən gənc qaçış həvəskarı da mükafatlandırılmışdır. Bütün iştirakçılara Beynəlxalq Olimpiya Komitəsinin Qaçış günündə iştirakını təsdiq edən sertifikat verilmişdir.
######
Bölmənin digər xəbərləri
