Bakı, 9 aprel, AZƏRTAC

Aprelin 11-də Azərbaycanda keçiriləcək prezident seçkiləri Pakistanın nüfuzlu kütləvi informasiya vasitələrinin diqqət mərkəzindədir.

AZƏRTAC xəbər verir ki, ingilisdilli “Daily Times” və “Pakistan Observer” qəzetlərində dərc olunmuş məqalələrdə ölkəmizdəki seçkiqabağı vəziyyət, seçkilərə hazırlıqla bağlı görülmüş işlər barədə ətraflı məlumat verilir.

Məqalələrdə Azərbaycanda aprelin 11-də keçiriləcək prezident seçkilərinin ölkənin inkişafında yeni mərhələnin başlanğıcı olacağı vurğulanır. Bildirilir ki, xaricdə yaşayan Azərbaycan vətəndaşlarının səs vermələri üçün 41 seçki məntəqəsi yaradılıb. Bununla da ölkə ərazisindən kənarda olan Azərbaycan vətəndaşları rahat şəkildə səs verə biləcəklər. Qeyd edilir ki, seçki məntəqələrində 1000 veb-kamera quraşdırılıb və bu da seçkilərin demokratik və şəffaf keçirilməsinə kömək edəcək. Görülən işlər Azərbaycanın budəfəki seçkiləri daha mütəşəkkil və şəffaf keçirmək niyyətindən xəbər verir.

Diqqətə çatdırılır ki, prezident seçkilərini izləmək üçün 870-dən çox beynəlxalq müşahidəçi Mərkəzi Seçki Komissiyasında akkreditasiyadan keçib və onlar 58 beynəlxalq təşkilatı təmsil etməklə 59 ölkənin vətəndaşlarıdır. İndiyədək 56 min 864 yerli müşahidəçi akkreditasiyadan keçib. Onlardan 1962-si MSK-da akkreditasiyadan keçərək bütün ölkə ərazisində, 54 min 902-si isə dairə seçki komissiyalarında akkreditasiyadan keçərək müvafiq dairənin hüdudları daxilində müşahidə aparmaq hüququ qazanıb.

Məqalələrdən birində Azərbaycan Milli Məclisinin deputatı, Demokratik İslahatlar Partiyasının sədri Asim Mollazadənin sechki-2018.az saytına açıqlamasından fikirlərə yer verilir. Bildirilir ki, Azərbaycanda seçkiöncəsi mühit demokratik prinsipləri özündə əks etdirir. Ölkədə hökm sürən sabitlik, təkmilləşdirilmiş seçki qanunvericiliyi şəffaf və ədalətli seçkilərin keçirilməsi üçün lazım olan əsas amillərdir. Seçkidə iştirak etməyənlərə də fikirlərini sərbəst şəkildə ifadə etmək şəraiti yaradılıb. Bu, beynəlxalq ictimaiyyət tərəfindən qəbul edilən demokratik prinsiplərin qorunması deməkdir. Seçkiöncəsi proses normal şəkildə davam edir. Heç bir pozuntu qeydə alınmayıb, seçkidə iştirak edən subyektlərin narazılığı yoxdur.

Digər məqalədə isə Dünya Azərbaycanlıları Konqresi İcra Aparatının rəhbəri, Beynəlxalq Diaspor Mərkəzi sədrinin birinci müavini Samir Adıgözəllinin sechki-2018.az saytına müsahibəsindən fikirlər əksini tapır. Vurğulanır ki, Azərbaycan indiyədək seçkilərin keçirilməsi ilə bağlı böyük uğurlar əldə edib. Bu ölkənin əvvəlki illərdə qazandığı beynəlxalq seçki təcrübəsi onu deməyə əsas verir ki, Azərbaycan bu sahədə Avropa dövlətləri ilə tam ayaqlaşır.

Qazaxıstan Xalqları Assambleyası sədrinin müavini Əbülfəz Xamedovun sechki-2018.az saytına açıqlamasından fikirlərə yer verilən məqalədə prezident seçkilərinin Azərbaycanda yeni mərhələnin başlanğıcı olacağı diqqətə çatdırılır. Azərbaycanda beynəlxalq standartlara uyğun seçki sisteminin olduğu vurğulanır.

Məqalələrdə “Associated Press of Pakistan” agentliyinə istinadla bildirilir ki, Azərbaycan vətəndaşları İlham Əliyevin yürütdüyü siyasətin yeganə düzgün inkişaf yolu olduğunu qəbul edirlər və qarşıdan gələn prezident seçkilərində onun qələbə qazacağına və bu qələbənin ölkəyə sabitlik gətirəcəyinə, xarici investisiyaların daha da çoxalmasına səbəb olacağına inanırlar.