Azərbaycanda kosmik hava istiqamətində həyata keçirilmiş elmi-tədqiqat fəaliyyəti təqdim edilib
BDU-nun rektoru Beynəlxalq Kosmik Hava Təşəbbüsü proqramının Rəhbər Komitə iclasında məruzə ilə çıxış edib
Bakı, 5 fevral, AZƏRTAC
Avstriyanın Vyana şəhərində BMT-nin Kosmosdan Dinc Məqsədlər üçün İstifadə üzrə Komitəsinin (UNCOPUOS) koordinasiyası ilə Beynəlxalq Kosmik Hava Təşəbbüsü (International Space Weather Initiative – ISWI) proqramının Rəhbər Komitəsinin növbəti iclası keçirilir. İclas çərçivəsində Bakı Dövlət Universitetinin (BDU) rektoru və ISWI üzrə Azərbaycanın milli koordinatoru Elçin Babayev BMT-nin Xarici Kosmos Məsələləri üzrə Ofisinin (UNOOSA) dəvəti ilə son beş ildə Azərbaycanda kosmik hava sahəsində həyata keçirilmiş elmi və elmi-təşkilati fəaliyyətə həsr olunmuş məruzə ilə çıxış edib.
BDU-dan AZƏRTAC-a bildirilib ki, təqdimat əsasən Azərbaycanda kosmik hava (Space Weather) istiqamətində həyata keçirilmiş elmi-tədqiqat fəaliyyəti, beynəlxalq əməkdaşlıq mexanizmləri, ölçmə cihazlarından alınan məlumatların təhlili sahəsində əldə edilmiş nəticələrə həsr olunub. Məruzədə ölkədə kosmik hava müşahidələrinin təşkili, beynəlxalq şəbəkələrdə iştirak, məlumatların təhlili və modelləşdirmə proseslərinə inteqrasiya, eləcə də bu istiqamətdə formalaşan elmi potensial geniş şəkildə təqdim edilib. Azərbaycanda kosmos və kosmik hava sahəsində fəaliyyət göstərən müvafiq qurumlar, həyata keçirilən tədqiqatlar və layihələr barədə ətraflı məlumat verilib.
Eyni zamanda, çıxışda kosmik hava üzrə tədqiqatların ali təhsil mühitinə inteqrasiyası, kadr hazırlığı, gənc tədqiqatçıların və tələbələrin bu sahəyə cəlb olunması, cəmiyyətin maarifləndirilməsi və ictimaiyyətlə əlaqələr fəaliyyətinin gücləndirilməsi məsələlərinə diqqət yetirilib. Vurğulanıb ki, kosmik hava hadisələrinin öyrənilməsi təkcə fundamental elm baxımından deyil, həm də Günəşin Yerə, atmosferə, ionosferə və maqnit sahəsinə, həmçinin bioloji sistemlərə və iqlimə mümkün təsirləri, o cümlədən müasir texnoloji sistemlərin - rabitə, naviqasiya və enerji infrastrukturlarının təhlükəsizliyi baxımından mühüm əhəmiyyət kəsb edir. Çıxışın sonunda Azərbaycanın bu istiqamətdə növbəti beynəlxalq elmi tədbirlərə ev sahibliyi etməyə hazır olduğu da diqqətə çatdırılıb.
ISWI Rəhbər Komitəsinin iclası milli koordinatorlar üçün öz ölkələrində həyata keçirilən fəaliyyətlərin, tədqiqat nəticələrinin və gələcək planların təqdimatı baxımından mühüm platforma rolunu oynayır. Bu baxımdan, Azərbaycanın kosmik hava sahəsində son illərdə atdığı addımlar və BDU-nun aparıcı akademik mərkəz kimi bu prosesdə oynadığı rol maraqla qarşılanıb.
Beynəlxalq Kosmik Hava Təşəbbüsü proqramı BMT-nin aidiyyəti qurumları və aparıcı elmi mərkəzlərin iştirakı ilə kosmik havanın öyrənilməsi, monitorinqi və proqnozlaşdırılması istiqamətində qlobal elmi əməkdaşlığı təşviq edən nüfuzlu beynəlxalq platformadır.
Bölmənin digər xəbərləri
