Azərbaycanda ov edilməsi qadağan olunan ərazilərin adı açıqlanmışdır
Bakı, 3 iyun (AZƏRTAC). Ekologiya və Təbii Sərvətlər Nazirliyinin Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamenti ov edilməsi qadağan olunan ərazilərin adını açıqlamışdır.
AZƏRTAC xəbər verir ki, departamentin direktorunun müavini Hikmət Əlizadə müsahibəsində Ağdam, Göygöl, Goranboy, Daşkəsən, Gədəbəy və Tərtər rayonlarında, Xəzər dənizinin adalarında, yaşıl zonalarda, xüsusi mühafizə olunan ərazilərdə, şəhərlərin və kurort ərazilərinin ətrafındakı 1 kilometrə qədər sahələrdə ovun qadağan edildiyini bildirmişdir.
Qeyd etmişdir ki, Lənkəran, Astara, Lerik, Qax, Cəlilabad, Zaqatala, İmişli, Quba, Xaçmaz, Neftçala, Yardımlı, Şəki və İsmayıllıda qabanın (çöl donuzu), Zaqatala, Şəki, Qax və Qubada təkənin, Dəvəçi, Kürdəmir, Salyan, Neftçala, Cəlilabad, Biləsuvar, Yevlax, Lənkəran, Zaqatala, Ağstafa, Qazax, Zərdab, Masallı, Quba, Xaçmaz, İmişli, Sabirabad və Saatlıda isə dovşanın ovuna icazə verilir.
Onun sözlərinə görə, birdəfəlik ov icazəsinin qiyməti dovşan - 2 manat 20 qəpik, çaqqal - 3 manat 96 qəpik, yenot və qunduz - 1 manat 65 qəpik, təkə - 24 manat 75 qəpik, qaban (çöl donuzu) - 16 manat 50 qəpik məbləğində müəyyən edilmişdir.
Bölmənin digər xəbərləri
