Azərbaycanın ali məktəblərində media təhsilinin hazırkı vəziyyətinə dair müzakirələr aparılıb
Bakı, 7 dekabr, M.Dadaşov, AZƏRTAC
Dekabrın 7-də “Azərbaycanda ali məktəblərdə media təhsili” mövzusunda beynəlxalq konfrans keçirilib.
AZƏRTAC xəbər verir ki, tədbirdə Avropa Şurası (AŞ) Bakı ofisinin rəhbəri Zoltan Hernyes layihə haqqında məlumat verib. Bildirilib ki, bu layihə AŞ və Avropa İttifaqı (Aİ) tərəfindən Şərq Tərəfdaşlığı ölkələrində reallaşdırılan “Proqramlar üzrə Əməkdaşlıq Çərçivəsi”nin “İfadə azadlığı və media azadlığı” layihəsi üzrə həyata keçirilir. Konfransın müvafiq mövzuda geniş fikir mübadiləsi aparmaq üçün əlverişli imkanlar yaradacağına əminliyi bildirən Z.Hernyes diqqətə çatdırıb ki, layihə çərçivəsində Azərbaycanda ali məktəblərdə media təhsilinin hazırkı vəziyyəti araşdırılıb.
Qeyd edilib ki, ifadə azadlığı bir sıra mühüm beynəlxalq sənədlərdə əksini tapan fundamental prinsiplərdən biridir. 1995-ci ildə qəbul edilmiş Azərbaycan Konstitusiyasında da bu müddəaya yer ayrılıb.
Aİ-nin ölkəmizdəki nümayəndəliyinin rəhbəri, səfir Kestutis Yankauskas diqqətə çatdırıb ki, bu qurum müvafiq sahədə Azərbaycan ilə uzun illərdir əməkdaşlıq edir. Konfrans “İfadə azadlığı və media azadlığı” layihəsi çərçivəsində son iki ildə görülən işlərin nəticələrinin təqdim edilməsi məqsədilə təşkil olunub. Bu təşəbbüs media nümayəndələri ilə əməkdaşlıq baxımından faydalıdır. Ümidvaram ki, konfrans layihənin digər nəticələri ilə birlikdə, jurnalistika sahəsində mühüm nailiyyətlərin əldə edilməsinə, ifadə azadlığı anlayışının Azərbaycanda geniş təbliğinə növbəti töhfə olacaq.
Azərbaycanda media sahəsində əldə edilən uğurlardan danışan Mətbuat Şurasının sədri, Milli Məclisin deputatı Əflatun Amaşov bildirib ki, ölkəmizdə bütün sektorlarda olduğu kimi, müvafiq istiqamətdə də inkişaf nəzərə çarpır. Bir sıra universitetlərimizdə jurnalistika fakültələri fəaliyyət göstərir. Bu sahədə bu günədək kifayət qədər işlər görülüb. Ancaq istərdik ki, yüksək ixtisaslı kadrların sayı çox olsun. Bu layihə çərçivəsində Azərbaycan jurnalistikasının inkişafına töhfə verəcək önəmli tədbirlər keçirilib.
Azərbaycan Respublikasının Prezidenti Administrasiyasının ictimai-siyasi məsələlər şöbəsinin məsul əməkdaşı Vüqar Səlimov diqqətə çatdırıb ki, layihə çərçivəsində Azərbaycan-AŞ əməkdaşlığının yeni istiqaməti üzrə tədbirlər həyata keçirilib. Nəticədə Azərbaycanda jurnalistika peşəkarlığının artırılması, beynəlxalq təcrübənin öyrənilməsi baxımından uğurlu addımlar atılıb. Layihədə ölkəmizin ali təhsil ocaqları ilə əməkdaşlığa xüsusi diqqət ayrılıb. Bu da gələcəyin peşəkar jurnalistləri kimi yetişməkdə olan tələbələrin öz peşələrini daha böyük maraqla mənimsəmələrinə şərait yaradır.
Təhsil Nazirliyinin ictimaiyyətlə əlaqələr sektorunun müdiri Cəsarət Valehov mövzunun aktuallığına toxunaraq medianın həyatımızın bütün istiqamətlərində mühüm təsirə malik olduğunu deyib. Bildirilib ki, bu baxımdan həmin sahədə çalışanların, jurnalistlərin və ümumilikdə media nümayəndələrinin qarşısında duran vəzifələrin, hədəflərin düzgün müəyyənləşdirilməsi vacib məqamlardır.
Bakı Dövlət Universitetinin jurnalistika fakültəsinin professoru Cahangir Məmmədli diqqətə çatdırıb ki, Azərbaycan müstəqilliyini bərpa etdikdən sonra ölkədə bütün istiqamətlərdə olduğu kimi azad media, azad fikir kimi dəyərlərin yayılmasında da mühüm işlər görülüb. Avropanın demokratik media institutları ilə əməkdaşlığın genişləndirilməsi, müvafiq sahədə Avropa təcrübəsindən istifadə edilməsi bu gün ölkəmizdə bəşəri dəyərlərə verilən qiymətin göstəricisidir.
Konfrans çərçivəsində “Fotojurnalistika”, “Radio jurnalistikası”, “Televiziya jurnalistikası”, “Yeni media jurnalistikası” dərsliklərinin təqdimatı olub. Bu nəşrlər “Azərbaycanda ifadə azadlığı və media azadlığı” layihəsi çərçivəsində çapdan çıxıb. Yerli və xarici jurnalistlərin iştirakı ilə hazırlanmış “Fotojurnalistika” Azərbaycan dilində nəşr olunan ilk fotojurnalistika dərsliyidir. Nəşrdə AZƏRTAC-ın fotomüxbiri İlqar Cəfərovun lentə aldığı, beynəlxalq mükafatlara layiq görülmüş dörd foto yer alıb.
Konfrans işini “Azərbaycanda ali media təhsili: nailiyyətlər, problemlər və perspektivlər”, “Media təhsili və Avropa təcrübəsi” sessiyaları üzrə davam etdirib. Tədbirin “İfadə azadlığı və media azadlığı” layihəsi və Azərbaycanda media təhsilinə töhfə” sessiyasında media üzrə ekspert Aynur Bəşirova “Media təhsilinə yeni yanaşma” mövzusunda təqdimatla çıxış edib. Müvafiq sahənin yeni kriteriyaları, müasir tendensiyalar, dəyişən tələblər və digər maraqlı məqamlara toxunulan təqdimatda fotojurnalistika, televiziya və radio jurnalistikası, yeni media jurnalistikası ayrı-ayrılıqda təqdim edilib.
Bölmənin digər xəbərləri
