AZƏRBAYCANIN ATLETİKA ÜZRƏ YIĞMA KOMANDASI AVROPA ÇEMPİONATINDA 5-Cİ YERİ TUTMUŞDUR
Bakı, 22 iyun (AZƏRTAC). Bosniya və Herseqovinada atletika üzrə komandalar arasında Avropa çempionatının 3-cü zonasında yarışları başa çatmışdır. Azərbaycan yığması ümumi komanda hesabında 327,5 xalla 5-ci yeri tutmuşdur.
Yarışın ilk günü Ramil Quliyev 100 metr məsafəyə qaçışda qızıl medal qazanmışdır. Efiopiyalı idmançılarla gücləndirilən Azərbaycan yığması həmin gün daha 6 medala sahib olmuşdur.
Mare İbrahimova qadınların 3 min metr məsafəyə qaçışında finiş xəttini hamıdan tez keçmişdir. Eyni məsafəyə sədlərlə qaçışda Layes Abdullayeva da birinci nəticəni göstərmişdir. Kişilərin yarışında Hayle İbrahimov 1500 metr məsafəyə yarışda qızıl medala sahib olmuşdur. Kişilərin estafet qaçışında Azərbaycan yığması birinci yeri tutmuşdur.
Qadınların 400 metr məsafəyə sədlərlə yarışmasında Olesya Xaspoladova fəxri kürsünün ən yükək pilləsinə qalxmışdır. Tilahun Əliyev isə 5 min metr məsafəyə qaçışda gümüş medal qazanmışdır.
Yarışın ikinci günü də komandamız üçün uğurlu olmuşdur. Bu dəfə üç təkanla uzunluğa tullanma yarışlarında Teymur Abbasov ən yüksək nəticəni göstərmişdir. Gözəşin Səfərova qadınların 1500 metr, Mare İbrahimova 5 min metr, Ramil Quliyev kişilər arasında 200 metr, Hayle İbrahimov isə 3 min metr məsafəyə qaçışda bütün rəqiblərini qabaqlamışlar.
Bununla belə, Azərbaycan yığması gələn ildən Avropa çempionatının daha güclü - 2-ci zonasında yarışmaq hüququ verən vəsiqəni qazana bilməmişdir. Bu vəsiqələrə yarışda ilk iki yeri tutmuş İsrail və Moldova komandaları sahib çıxmışlar.
Bölmənin digər xəbərləri
