Azərbaycanın basketbol yığmaları Avropa Kubokunda mübarizə aparacaqlar
Bakı, 19 avqust, AZƏRTAC
Azərbaycanın 3x3 basketbol üzrə kişi və qadın yığmaları Avropa Kubokunda mübarizə aparacaqlar.
Azərbaycan Basketbol Federasiyasının mətbuat xidmətindən AZƏRTAC-a bildiriblər ki, mübarizəyə ilk olaraq qadın millisi start verəcək.
Kollektiv ilk qrup oyununu avqustun 22-də Bakı vaxtı ilə saat 15:40-da İspaniya, ikinci qrup matçını saat 19:15-də Avstriyaya qarşı keçirəcək.
Kişilərdən ibarət millinin qrupdakı rəqibləri isə Avstriya və Niderland seçmələridir. Yığma ilk qrup oyununda Bakı vaxtı ilə saat 15:40-da Niderland, ikinci görüşündə isə saat 19:15-də Avstriya ilə üz-üzə gələcək. Hər iki qarşılaşma avqustun 23-də oynanılacaq.
Qruplarda ilk iki sıranı tutmuş komandalar 1/4 finala vəsiqə qazanacaqlar.
Yarışlar avqustun 22-25-də Avstriyanın paytaxtı Vyana şəhərində təşkil olunacaq.
Bölmənin digər xəbərləri
