Azərbaycanın beynəlxalq diplomatiyadakı rolu: AQEM Forumu və ölkəmizin uğurları - ŞƏRH
Bakı, 9 sentyabr, AZƏRTAC
Azərbaycanın paytaxtı Bakı beynəlxalq müstəvidə öz mövqeyini bir daha güclü şəkildə nümayiş etdirir. Belə ki, Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Beyin Mərkəzləri Forumunun 13-cü sessiyası burada keçirilir. Bu tədbir Asiyanın təhlükəsizlik və əməkdaşlıq məsələlərinə həsr olunmuş strateji platformadır. Prezident İlham Əliyevin də sessiya iştirakçılarına müraciətində qeyd etdiyi fikirlər regional və qlobal sabitliyin vacibliyini vurğulayır.
Bu sözləri AZƏRTAC-a açıqlamasında politoloq Tural İsmayılov söyləyib.
O bildirib ki, bu forum Azərbaycanın beynəlxalq tədbirlərə ev sahibliyi ənənəsinin davamıdır: “Xatırlayırıq ki, 2012-ci ildə Bakıda təşkil olunan “Avroviziya Mahnı Müsabiqəsi” ölkəmizin mədəniyyətini və multikultural dəyərlərini dünyaya tanıtmışdı. Minlərlə xarici qonaq Bakının qonaqpərvərliyindən zövq almışdı. Avroviziya müsabiqəsi Azərbaycanın təşkilatçılıq bacarığını qlobal miqyasda sübut etdi”.
Politoloq deyib ki, Azərbaycanın 2015-ci ildə I Avropa Oyunlarına da yüksəksəviyyəli ev sahibliyi etməsi hər kəsə məlumdur. l Avropa Oyunlarına da 50-dən çox ölkədən idmançıların qatılması bu tədbiri daha əhəmiyyətli edirdi. Beynəlxalq rəyvericilər, həmçinin xarici media subyektləri Azərbaycanın müasir idman infrastrukturunu nümayiş etdirən Avropa Oyunlarının yüksək səviyyədə təşkilindən danışırdılar. Bu, Azərbaycanın idman sahəsindəki potensialını dünyaya göstərdi: “Formula 1 Azərbaycan Qran-Prisi 2016-cı ildən etibarən Bakının simvoluna çevrilib. Bu yarış hər il minlərlə turisti ölkəmizə gətirir, Bakının müasir şəhər infrastrukturunun beynəlxalq mediaya çıxmasına kömək olur. Formula 1 Azərbaycanın turizm və iqtisadi inkişafına böyük töhfədir. Eyni zamanda, tədbir ölkəmizin qlobal brendini gücləndirməkdə mühüm rol oynayır”.
Tural İsmayılov 2011-ci ildən Azərbaycanda keçirilən Ümumdünya Mədəniyyətlərarası Dialoq Forumundan da danışıb. Bildirib ki, bu Forum da fərqli mədəniyyətlər arasında körpü yaratmağa xidmət edən mədəni tədbir kimi xatırlanır. Dialoq Forumu Azərbaycanın sülh modelini vurğulamaqla yanaşı, ölkəmizin multikultural dəyərlərə sadiqliyimiz beynəlxalq aləmdə yüksək formada təbliğ etdi. Azərbaycanın multikultural modeli beynəlxalq ekspertlər tərəfindən da öyrənilməyə başlanıldı. Həmçinin Forum ölkəmizin sülh və əməkdaşlıq siyasətinin təbliğinə töhfə oldu, Bakını mədəni diplomatiyanın mərkəzinə çevirdi. Bu, ölkəmizin tolerantlıq ənənələrinin qlobal təşviqinə töhfə verdi və proses indi də uğurla davam edir.
Politoloq xatırladıb ki, 2019-cu ildə Qoşulmama Hərəkatına (QH) üzv ölkələrin dövlət və hökumət başçılarının XVIII Zirvə görüşü də Bakıda baş tutmuşdu. Xarici ölkələrin liderlərinin bu tədbirdə iştirakı Azərbaycanın diplomatik uğurunu növbəti dəfə göstərdi.
2024-cü ildə BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının (COP29) Azərbaycanda təşkili ölkəmizin iqlim məsələsində də liderliyini göstərdi. Həmçinin yaşıl enerji sahəsindəki layihələrimiz beynəlxalq səviyyədə təqdir olundu. COP29 Azərbaycanın ekoloji diplomatiyasında da yeni səhifə açdı. Tədbir ölkəmizin infrastruktur və təşkilatçılıq bacarığını bir daha sübut etdi.
“AQEM-in Beyin Mərkəzləri Forumunun 13-cü sessiyası isə Azərbaycanın Asiyadakı rolunu daha da gücləndirir. Ümumilikdə isə Azərbaycanın AQEM-ə sədrliyi ölkəmizin beynəlxalq təşkilatlarda liderliyini və nüfuzunu göstərir. Forumda Azərbaycanın təşəbbüsü müzakirə edilən regional təhlükəsizlik və iqtisadi inkişaf məsələləri Asiyanın sabitliyinə töhfədir. 2026-cı ildə BMT-nin Dünya Şəhərsalma Forumu da Bakıda keçiriləcək. Forum vasitəsilə Azərbaycanın şəhərsalma sahəsindəki uğurları nümayiş etdiriləcək. Bu, Bakını qlobal tədbirlər mərkəzinə çevirəcək. Beynəlxalq tədbirlərə uğurlu ev sahibliyi Azərbaycanı beynəlxalq arenada sülh və əməkdaşlıq simvolu kimi tanıdır”, - deyə Tural İsmayılov fikirlərini tamamlayıb.
Bölmənin digər xəbərləri
