Azərbaycanın Çin və ŞƏT məkanı ilə əməkdaşlıq imkanları genişlənir – RƏY
Bakı, 2 sentyabr, AZƏRTAC
Prezident İlham Əliyevin Qırğızıstana işgüzar səfəri Azərbaycanın fəal və çoxşaxəli xarici siyasətinin növbəti mühüm göstəricisidir. Bişkekdə keçirilən yüksəksəviyyəli tədbirlər və aparılan ikitərəfli görüşlər Azərbaycanın həm regional proseslərin iştirakçısı, həm də müxtəlif siyasi və iqtisadi platformalar arasında əlaqələrin qurulmasında mühüm rol oynayan orta güc olduğunu bir daha nümayiş etdirib.
Bu sözləri AZƏRTAC-a açıqlamasında Milli Məclisin deputatı Könül Nurullayeva deyib.
O qeyd edib ki, son illər Azərbaycan-Mərkəzi Asiya münasibətlərinin yeni məzmun qazandığını xüsusi vurğulamaq lazımdır. Əvvəllər əsasən siyasi və humanitar əlaqələrlə xarakterizə olunan münasibətlər bu gün iqtisadiyyat, nəqliyyat, logistika, enerji və ticarət sahələrini əhatə edən çoxşaxəli tərəfdaşlığa çevrilir. Bu prosesdə Azərbaycanın coğrafi mövqeyi mühüm üstünlükdür. Xəzər dənizi ölkəmizi Mərkəzi Asiyanın aparıcı dövlətləri ilə birləşdirən təbii bağlantı məkanıdır. Digər tərəfdən, Azərbaycanın yaratdığı müasir nəqliyyat infrastrukturu Şərqdən Qərbə uzanan marşrutların səmərəliliyini artırır. Bu baxımdan Qazaxıstan Prezidenti Kasım-Jomart Tokayevlə keçirilən görüş xüsusi əhəmiyyət daşıyır. Bakı və Astana Xəzər üzərindən Şərq-Qərb nəqliyyat bağlantısının inkişafında əsas tərəfdaşlardandır. Çin və Mərkəzi Asiyadan Avropaya uzanan Orta Dəhlizin əhəmiyyətinin artması fonunda Azərbaycan-Qazaxıstan əməkdaşlığı daha geniş geoiqtisadi məna kəsb edir.
“Səfərin mühüm siyasi hadisələrindən biri Prezident İlham Əliyevin Ermənistanın Baş naziri Nikol Paşinyanla görüşü olub. Azərbaycan və Ermənistan liderlərinin müxtəlif beynəlxalq tədbirlər çərçivəsində birbaşa təmaslarının davam etdirilməsi regionda sülh gündəliyinin qorunması baxımından əhəmiyyətlidir. Xüsusilə son dövrdə əldə edilən razılaşmaların praktiki nəticələrə çevrilməsi üçün siyasi dialoqun davamlı olması vacibdir.
Bişkek görüşü bir daha göstərdi ki, Azərbaycan regional təhlükəsizlik məsələlərində fəal mövqeyi ilə seçilir. Ölkəmiz regionda yeni siyasi reallıqların formalaşdırılması və davamlı sülhün təmin olunması prosesində aktiv iştirak edir.
Azərbaycanın mövqeyi ondan ibarətdir ki, Cənubi Qafqazda sülh və sabitlik həm də iqtisadi və nəqliyyat əlaqələrinin genişlənməsi üçün yeni imkanlar açmalıdır. Sülhün iqtisadi dividendlərə çevrilməsi isə region ölkələrinin qarşılıqlı əməkdaşlığını daha da gücləndirəcək”, - deyə deputat bildirib.
Könül Nurullayeva Azərbaycanın ŞƏT məkanına marağını şərtləndirən əsas amillərdən birinin də məhz onun coğrafi mövqeyi olduğuna diqqət çəkib: “Ölkəmiz Xəzər dənizi vasitəsilə Mərkəzi Asiyanı Cənubi Qafqaz və Avropa ilə birləşdirən mühüm halqadır. Orta Dəhlizin inkişafı Azərbaycanın bu baxımdan əhəmiyyətini daha da artırır. Yəni Azərbaycan-ŞƏT əməkdaşlığının perspektivlərini yalnız siyasi dialoq çərçivəsində qiymətləndirmək doğru olmaz. Burada nəqliyyat və logistika ilə yanaşı, ticarət, investisiya, rəqəmsal iqtisadiyyat, yaşıl enerji, yüksək texnologiyalar, kənd təsərrüfatı, turizm, elm və təhsil kimi istiqamətlər üçün də geniş imkanlar mövcuddur. Ümumiyyətlə, dövlətimizin başçısının Bişkek səfəri Azərbaycanın regional sülh və təhlükəsizlik gündəliyində fəal iştirakını, Mərkəzi Asiya ilə strateji əlaqələrin gücləndirildiyini, Çin və ŞƏT məkanı ilə əməkdaşlıq imkanlarının genişləndiyini göstərib. Bütün bunların fonunda Bişkek səfəri Azərbaycanın xarici siyasətində siyasi dialoq, iqtisadi əməkdaşlıq, nəqliyyat bağlantıları və humanitar həmrəyliyin vahid strateji xətt üzrə birləşdirildiyini təsdiqləyir”.
Bölmənin digər xəbərləri
