Azərbaycanın insan hüquqları üzrə müvəkkili Ankarada ombudsmanların 2-ci beynəlxalq simpoziumunda iştirak edib
Azərbaycan Respublikasının insan hüquqları üzrə müvəkkili Elmira Süleymanova Ankarada Türkiyə Respublikasının Ombudsman Qurumu tərəfindən təşkil olunan ombudsmanların 2-ci beynəlxalq simpoziumunda iştirak edib.
Ombudsman Aparatından AZƏRTAC-a bildiriblər ki, simpoziuma Türkiyə Prezidenti Rəcəb Tayyib Ərdoğan, xarici işlər naziri Mövlud Çavuşoğlu, Avropa Şurasının insan hüquqları üzrə komissarı Nils Mujniyeks, bir çox ölkənin ombudsmanları qatılıblar.
Tədbirdə insan hüquqları sahəsində qlobal xarakterli mühüm problemlər, o cümlədən insan hüquqlarının səmərəli müdafiəsində qarşıya çıxan maneələr və ombudsman təsisatlarının bu istiqamətdə və demokratiyanın bərqərar olunmasında rolu ilə bağlı məsələlər müzakirə edilib.
E.Süleymanova simpoziumda “Dövlət qurumları və ya vəzifəli şəxslərlə vətəndaşlar arasında yaranan mübahisələrin dostcasına həllində Ombudsmanın rolu” mövzusunda məruzə ilə çıxış edib.
Müvəkkil mübahisələrin məhkəmədən kənar həllində innovativ yolların tapılması və tətbiq edilməsinin insan hüquqlarının səmərəli müdafiəsində əhəmiyyətini vurğulayıb. O, bu qəbildən mübahisələrin dostcasına aradan qaldırılmasında vasitəçiliyə önəm verilməsi və bunun təcrübədə tətbiqi barədə ətraflı məlumat verib.
Bildirilib ki, Avropa Şurası Nazirlər Komitəsinin belə mübahisələrin məhkəmədən kənar həllində vasitəçiliyin inkişafı ilə əlaqədar tövsiyə xarakterli qərarlarının daha çatımlı olması, tətbiqinin genişləndirilməsi məqsədilə Şuranın dəstəyi ilə Azərbaycanda ilk dəfə olaraq maarifləndirmə tədbirləri keçirilib.
Müvəkkil çıxışında ölkəmizdə insan hüquqları sahəsində aparılan islahatlar, həyata keçirilən Dövlət proqramları barədə məlumat verib. O, 1998-ci il fevralın 22-də ümummilli lider Heydər Əliyevin imzaladığı “İnsan və vətəndaş hüquqlarının və azadlıqlarının təmin edilməsi sahəsində tədbirlər haqqında” Fərmandan və Ulu Öndərin 1998-ci il 18 iyun tarixli Sərəncamı ilə təsdiq edilmiş “İnsan hüquqlarının müdafiəsinə dair Dövlət Proqramı”ndan danışıb.
Ombudsman Prezident İlham Əliyevin 2006-cı il 28 dekabr tarixli Sərəncamı ilə təsdiq edilmiş “Azərbaycan Respublikasında İnsan hüquqlarının müdafiəsi üzrə Milli Fəaliyyət Planı” və yeni istiqamətlər müəyyən edən “İnsan hüquq və azadlıqlarının müdafiəsi sahəsində Milli Fəaliyyət Proqramı”nı ölkədə bu istiqamətdə həyata keçirilən siyasətin məntiqi davamı kimi qiymətləndirib.
E.Süleymanova tədbir iştirakçılarını gələn il Bakıda keçiriləcək ombudsmanların 13-cü beynəlxalq konfransına dəvət edib.
Müvəkkilin Türkiyənin Ombudsmanı Mehmet Nihat Öməroğlu ilə görüşündə ikitərəfli əməkdaşlıq haqqında müzakirələr aparılıb.
Ombudsman səfər çərçivəsində Ankara Universitetində Naxçıvan Muxtar Respublikasının 90 illik yubileyinə həsr olunmuş “Tarixdə və bu günümüzdə Naxçıvan” mövzusunda tədbirə qatılıb, Xocalı soyqırımı qurbanlarının xatirəsinə ucaldılmış abidəni ziyarət edib.
Bölmənin digər xəbərləri
