Azərbaycanın meşə fondu torpaqlarının 261 min hektarı işğal altındadır
Bakı, 7 fevral, AZƏRTAC
Fevralın 7-də “Marriott Abşeron” otelində Qlobal Ekologiya Fondunun maliyyələşdirdiyi və Ekologiya və Təbii Sərvətlər Nazirliyinin (ETSN) həyata keçirdiyi “Azərbaycanda meşə fondu barədə bilik bazasını gücləndirmək üçün meşə ehtiyatlarının qiymətləndirilməsi və monitorinqi” layihəsinin təqdimatına həsr olunmuş seminar keçirilib.
AZƏRTAC xəbər verir ki, layihənin əsas məqsədi Azərbaycanda dayanıqlı meşə təsərrüfatının qurulması, meşələrin sosial və iqtisadi səmərəliliyinin və karbonun udulmasının artırılması, eləcə də mövcud meşələrin keyfiyyətinin yaxşılaşdırılmasıdır.
Tədbirdə çıxış edən BMT-nin Ərzaq və Kənd Təsərrüfatı Təşkilatının (FAO) Azərbaycanda tərəfdaşlıq və əlaqələndirmə ofisinin rəhbəri Mələk Çakmak bildirib ki, layihə meşəçilik sahəsində məlumatların toplanması, qiymətləndirilməsi və hesabatların tərtibi üçün müasir metodikanın hazırlanmasına, operativ milli meşə qiymətləndirmə və monitorinq sisteminin qurulmasına, seçilmiş pilot ərazilərdə meşə təsərrüfatının planlaşdırılmasının təkmilləşdirilməsinə töhfə verəcək. Yerli kiçik fermerlər üçün gəlir gətirən fəaliyyətlərin nümayiş etdirilməsi və tətbiqi imkanlarının araşdırılması ilə yanaşı, deqradasiyaya uğramış meşə fondu torpaqlarında karbon ehtiyatlarının artırılması, meşə ehtiyatları barədə yenilənmiş məlumatların və istiqamətlərin təchiz edilməsi, əldə edilmiş təcrübələrin və müvafiq qaydaların yayılması vasitəsilə dayanıqlı meşə idarəçiliyinin təmin edilməsi layihənin başlıca nəticələri sırasına daxildir.
O, qeyd edib ki, layihə çərçivəsində cəlb ediləcək beynəlxalq və yerli mütəxəssislərin köməyi ilə ETSN-in əməkdaşlarına meşələrin qiymətləndirməsi və monitorinqi sisteminin operativləşdirilməsində, meşə və karbon ehtiyatlarının inventarlaşdırılmasında “Collect Earth” proqram təminatından, eləcə də karbonun hesablanması üçün “Ex-Act” karbon balans qiymətləndirmə sistemindən istifadə barədə modullar üzrə təlim keçiriləcək. Meşə təsərrüfatının planlaşdırılması və Coğrafi İnformasiya Sisteminə dair təlimlər də layihə boyu icra olunacaq.
Bununla yanaşı, layihə Azərbaycanın Birləşmiş Millətlər Təşkilatının İqlim Dəyişikliyi haqqında Çərçivə Konvensiyası ilə bağlı Paris Sazişindən irəli gələn öhdəliklərini icra etməsinə köməklik göstərəcək. Qeyd edək ki, Paris Sazişinə qoşulmaqla ölkə 2030-cu ilə kimi 1990-cı ilə nisbətdə istilik effekti yaradan qaz tullantılarını 35 faizə qədər azaltmaq öhdəliyini götürüb.
Daha sonra ekologiya və təbii sərvətlər nazirinin müavini Firdovsi Əliyev çıxış edərək nazirliyin gördüyü işlərdən danışıb. O, çıxışı zamanı Azərbaycanın meşə fondu torpaqlarının 261 min hektarının işğal altında olduğunu vurğulayıb. Nazir müavini erməni vandallarının həmin ərazilərin biomüxtəlifliyinə ziyan vurduğunu, fauna və florasının təhlükədə olduğunu və bu məsələnin hər bir Azərbaycan vətəndaşını narahat etdiyini qeyd edib.
“Ölkə ərazisinin 12 faizini meşə fondu torpaqları təşkil edir. Azərbaycanda meşələrin ümumi sahəsi isə 1 milyon 21 min hektardır. Son 16 il ərzində Azərbaycanda 158,7 min hektar ərazidə meşə bərpa tədbirləri aparılıb, 52,1 min hektar ərazidə yeni meşəliklər salınıb, 106 milyon ağac əkilib. Bununla yanaşı respublikamızda son illər arid sahələrin, qeyri-münbit torpaqların təmizlənərək yararlı vəziyyətə gətirilməsindən sonra müasir metodlara əsaslanan yeni yaşıllaşdırma layihələri icra olunub. Dörd min hektardan çox ərazidə 5 milyondan çox ağac əkilib ki, bunun 1 milyona qədərini meyvə ağacları təşkil edib”, - deyə nazir müavini söyləyib.
Sonra FAO-nun Mərkəzi Asiya üzrə Ankaradakı subregional ofisinin nümayəndəsi, meşəçilik üzrə mütəxəssis Peter Peçaçek “Azərbaycanda meşə fondu barədə bilik bazasını gücləndirmək üçün meşə ehtiyatlarının qiymətləndirilməsi və monitorinqi” layihəsinin təqdimatını edib. P.Peçaçek təqdimat zamanı Azərbaycanda meşələrin qeyri-qanuni kəsilməsinin, mal-qara otarılmasının deqradasiyanın artmasına, məhsuldarlığın azalmasına səbəb olduğunu bildirib. Mütəxəssis gələn həftədən etibarən icrasına başlanacaq layihə çərçivəsində meşələrin dayanıqlı inkişafını təmin etmək üçün il ərzində 150 hektar ərazinin bərpasının nəzərdə tutulduğunu deyib.
Ekologiya və Təbii Sərvətlər Nazirliyinin Meşələrin İnkişafı Departamentinin direktor əvəzi Söhrab Abbasov qarşıdakı iki il üçün icra müddəti nəzərdə tutulmuş layihə ilə bağlı gözləntilərdən danışıb. O, öz çıxışında FAO-nun Azərbaycanda ərzaq, kənd təsərrüfatı və ətraf mühitin sağlamlaşdırılması istiqamətində gördüyü işlərin təqdirəlayiq olduğunu qeyd edib və nazirliyinin meşələrin mühafizə və idarə olunması sahəsində gördüyü işlərdən danışıb.
“Layihə çərçivəsində pilot ərazilərdə - Qax və Ağdaş rayonlarında nəzərdə tutulan meşəsalma və meşəbərpa tədbirləri, eləcə də Şəmkir Tinglik Təsərrüfatının və Toxum Laboratoriyasının modernləşdirilməsi fəaliyyətləri də bizim üçün əhəmiyyət daşıyır. Mütəxəssislərimiz də bu tədbirlərin icrası zamanı layihə işçilərinə daim dəstək göstərəcəklər”, - deyə direktor əvəzi söyləyib.
Seminar layihə ilə əlaqədar müxtəlif mövzuların məruzəsi və müzakirəsi ilə davam edib.
Qeyd edək ki, tədbirdə ETSN-in departamentlərindən olan mütəxəssislər, müvafiq dövlət qurumları və qeyri-hökumət təşkilatlarının nümayəndələri, FAO-nun baş qərargahı və Mərkəzi Asiya üzrə subregional ofisindən layihənin texniki və əməliyyat heyəti iştirak edib.
Bölmənin digər xəbərləri
