AZƏRBAYCANIN SƏUDİYYƏ ƏRƏBİSTANINDAKI SƏFİRLİYİNDƏ 20 YANVAR FACİƏSİNİN İLDÖNÜMÜNƏ HƏSR OLUNMUŞ ANMA MƏRASİMİ KEÇİRİLMİŞDİR
Bakı, 20 yanvar (AZƏRTAC). Yanvarın 20-də Azərbaycanın Səudiyyə Ərəbistanı Krallığındakı səfirliyində Qanlı Yanvar faciəsinin iyirminci ildönümü ilə əlaqədar anma mərasimi keçirilmişdir.
Səfirlikdən bildirmişlər ki, mərasimin əvvəlində şəhidlərimizin xatirəsi bir dəqiqəlik sükutla yad edilmişdir.
Səfir Tofiq Abdullayev 20 Yanvar faciəsinin başvermə səbəbləri, keçmiş sovet ordusunun Bakıda törətdiyi cinayətlər barədə ətraflı məlumat vermişdir. Bildirmişdir ki, 1990-cı il yanvarın 19-dan 20-nə keçən gecə sovet imperiyasının xüsusi təyinatlı qoşunları Bakıya soxularaq günahsız insanları - qocaları, qadınları, uşaqları vəhşicəsinə qətlə yetirmiş və əhaliyə qarşı qadağan olunmuş silahlardan istifadə etmişdir.
Diplomat vurğulamışdır ki, təqib və təhlükələrə baxmayaraq, faciədən dərhal sonra ümummilli liderimiz Heydər Əliyev Moskvada Azərbaycanın daimi nümayəndəliyinə gəlib mətbuat konfransı keçirmişdir. Ulu öndər bu vəhşiliyi qətiyyətlə pisləməklə yanaşı, onun səbəblərini də açıqlamış və faciənin təşkilatçılarının, günahkarlarının adını bütün dünyaya bəyan edərək, onların cəzalandırılması tələbi ilə çıxış etmişdir.
T.Abdullayev xalqımızın milli azadlıq mübarizəsinin şanlı səhifəsinə çevrilmiş 1990-cı ilin Qanlı Yanvar hadisələrindən 20 il keçməsinə baxmayaraq, faciə qurbanlarının xatirəsinin unudulmadığını və Azərbaycanın müstəqilliyi, dövlətçiliyimizin bərpası uğrunda mübarizədə həlak olmuş şəhidlərimizin misilsiz qəhrəmanlıqlarının vətəndaşlıq qürurunun və qan yaddaşımızın əyani təzahürü olduğunu qeyd etmişdir.
Digər çıxış edənlər də 1990-cı ilin yanvarında sovet ordusu tərəfindən Azərbaycanda törədilmiş faciənin insanlığa qarşı cinayət olduğunu vurğulayaraq, böyük itkilərlə, günahsız insanların qətli ilə nəticələnmiş Qanlı Yanvar faciəsinin Mixail Qorbaçov başda olmaqla, cinayətkar imperiya rəhbərliyinin xalqımıza qarşı xəyanətkar siyasətinin nəticəsi olduğunu demişlər. Bildirilmişdir ki, bu qanlı faciədən 20 il keçməsinə baxmayaraq, hələ də xalqımızın tarixinin qara səhifəsini təşkil edən dəhşətli hadisəni törədənlər öz layiqli cəzalarını almamışlar.
Natiqlər gələcəkdə bu faciənin beynəlxalq qurumlar tərəfindən ədalətli qiymətini alacağına ümid etdiklərini vurğulamış, 20 Yanvar qırğınının Azərbaycanda yalnız ümumxalq hüzn günü kimi qeyd edilmədiyini, eyni zamanda, imperiyanın respublikamıza qarşı xəyanətkar siyasətinə dözməyən, öz azadlığına və müstəqilliyinə can atan xalqımızın mübarizliyini və məğrurluğunu nümayiş etdirən bir qəhrəmanlıq nümunəsi kimi daim xatırladıqlarını bildirmişlər.
Səfirliyin zalında Qanlı Yanvar faciəsini əks etdirən materiallardan ibarət xüsusi guşə yaradılmışdır. Bundan əlavə, mərasim iştirakçıları ölkəmizin televiziya kanalları vasitəsilə yayımlanan və 20 Yanvar hadisələri ilə bağlı həqiqətləri əks etdirən materialları izləmişlər.
Bölmənin digər xəbərləri
