ELM VƏ TƏHSİL
“AZƏRBAYCANIN TARİXİ-SİYASİ COĞRAFİYASI”
“Araz” nəşriyyatı tarix elmləri doktoru, professor Vaqif Piriyevin “Azərbaycanın tarixi-siyasi coğrafiyası” kitabını çapdan buraxmışdır.
Ali məktəblərin tarix fakültələri və tarix fənni üzrə kadrların yenidən hazırlanması kursları üçün dərs vəsaiti kimi yazılmış kitab son vaxtlara qədər ölkə tarixşünaslığında, demək olar, diqqətdən kənarda qalmış bir mövzuya - Azərbaycanın ən qədim dövrlərdən zəmanəmizə qədərki tarixi-siyasi coğrafiyasına və onun tədrisi məsələlərinə həsr olunmuşdur.
Kitabda on dörd mövzu verilmişdir. İlk iki mövzuda tarixi coğrafiya fənninin vəzifələri, əlaqələri, elmi istiqamətləri, tədqiqat üsulları və metodlarından, Azərbaycanın qədim dövr tarixi-siyasi coğrafiyasının mənbələri və tarixşünaslığından bəhs edilir. Sonrakı mövzularda qədim dövrlərdən başlayaraq, XX əsrin 90-cı illərinədək ölkəmizin tarixi-siyasi coğrafiyasından söhbət açılır.
Həmin mövzularda müəllif tarixi faktlar əsasında müxtəlif dövrlərdə Azərbaycanın ərazisi, sərhədləri, inzibati bölgüsü, zaman-zaman torpaqlarımızın itirilməsi barədə məlumat verir, ərazilərimizə qarşı əsassız iddialara münasibətini açıqlayır.
Kitabın elmi redaktoru tarix elmləri doktoru, Azərbaycan MEA-nın müxbir üzvü Nailə Vəlixanlıdır.