AZƏRBAYCANLA PAKİSTAN ARASINDA ƏMƏKDAŞLIQ YÜKSƏLƏN XƏTLƏ İNKİŞAF EDİR
Aprelin 11-də Azərbaycanın xarici işlər naziri Vilayət Quliyev ölkəmizdə səfərdə olan Pakistan İslam Respublikası Milli Müdafiə Kollecinin admiralı Şahid Navazın başçılıq etdiyi nümayəndə heyəti ilə görüşmüşdür.
Nazirliyin mətbuat mərkəzindən AZƏRTAC-a bildirmişlər ki, respublika xarici siyasət idarəsinin başçısı ölkələrimiz arasındakı münasibətlərin tarixi və dostluq xarakteri daşıdığını, Pakistanın Azərbaycanın müstəqilliyini tanıyan ilk dövlətlərdən biri olduğunu xüsusi vurğulamışdır. Nazir Azərbaycanın Pakistan ilə əlaqələrin inkişafına böyük diqqət yetirdiyini və bu səfərin ikitərəfli əməkdaşlığın möhkəmlənməsinə təkan verəcəyinə ümid etdiyini bildirmişdir.
Sonra qonaqların xahişi ilə nazir Vilayət Quliyev Ermənistan-Azərbaycan, Dağlıq Qarabağ münaqişəsi və onun həlli istiqamətində göstərilən səylər, ATƏT-in Minsk qrupunun bu sahədə fəaliyyəti və Azərbaycan qaçqınlarının agır vəziyyəti barədə ətraflı məlumat vermişdir.
Admiral Şahid Navaz səmimi qəbula görə Vilayət Quliyevə öz təşəkkürünü bildirmiş, Azərbaycan və Pakistan arasındakı əməkdaşlığın inkişafına, o cümlədən hərbi sahədə əlaqələrin genişlənməsinə tərəfdar olduğunu bildirmişdir.
Görüşdə qarşılıqlı maraq doğuran bir sıra digər məsələlər də müzakirə olunmuşdur.
Bölmənin digər xəbərləri
