Azərbaycanlı deputat Avropa Şurasında Qırğızıstana diqqətin artırılmasının vacibliyindən danışıb
Strasburq, 23 iyun, AZƏRTAC
Avropa Şurası Parlament Assambleyası (AŞPA) uzun müddətdir ki, Avropa təşkilatı olmaq çərçivəsindən kənara çıxıb. Coğrafi baxımdan Avropaya daxil olmayan, başqa qitələrdə yerləşən bir neçə ölkə artıq uzun illərdir Assambleyanın iclaslarında yaxından iştirak edir, Avropa Şurası ilə fəal əməkdaşlıq əlaqələrini davam etdirir. Təşkilata üzv ölkələrdən kənara doğru əhatənin belə genişlənməsi bir tərəfdən bu qurumun beynəlxalq miqyasda məsuliyyət hissinin dərkindən irəli gəlsə də, digər tərəfdən Avropa ölkələrinin yaxın təmasda olduğu regionlarla körpülərimizin daha mötəbər təməllərə söykənməsi zərurətindən doğur. Səkkiz il öncə Avropa Şurasının demokratiya üzrə tərəfdaşı statusu qazanmış Qırğız Respublikası üçün bu təşkilatla sıx əməkdaşlıq çox sərfəlidir. Həmçinin coğrafiyamızdan kənarda, Mərkəzi Asiyadakı yeni müstəqil dövlətlərdən olan bu ölkə ilə sistemli əlaqələr çox əhəmiyyətlidir.
Bu fikirləri AŞPA-dakı nümayəndə heyətimizin üzvü Rafael Hüseynov qurumun yay sessiyası çərçivəsində “Qırğız Respublikası parlamenti ilə bağlı demokratiya naminə tərəfdaşlığa baxış” adlı məruzənin müzakirələri zamanı söyləyib. R.Hüseynov müzakirədə AŞPA-nın Avropa naminə Liberal Demokratlar Alyansı (ALDE) siyasi qrupu adından çıxış edib.
Avropa Şurasının təsir dairəsinin genişləndirilməsi zərurətindən söz açan Rafael Hüseynov bildirib ki, AŞ coğrafiyasının genişləndirilməsi insan haqları, demokratiya, hüquqi dövlət quruculuğu kimi dəyərlər şəbəkəsinin təmas dairəmizdəki daha geniş məkanda bərqərar olmasını əks etdirir.
Son illərdə Qırğız Respublikasında baş verən dəyişikliklərə, cərəyan edən proseslərə, 2020-ci il seçkilərindən sonra yaşanmış siyasi narahatlıqlara toxunan azərbaycanlı deputat qeyd edib ki, sadalanan bu hallar əlaqələrin normal axarda inkişafına mənfi təsirini göstərməyə bilməzdi. Avropa Şurası ilə demokratiya tərəfdaşı statusu qazandığı 8 il ərzində Qırğızıstan əvvəlcədən öhdəliklər götürmüş olsa da, hələ heç bir konvensiyaya qoşulmayıb. Ancaq bu, yollarımızın ayrılması kimi deyil, mövcud tarixi şəraitin nəticəsi kimi dəyərləndirilməlidir.
R.Hüseynov Qırğızıstanı müdafiə mövqeyindən çıxış edərək, Avropa Şurasının bu ölkəyə diqqət və qayğısının artırılmasının vacibliyini vurğulayıb: “Qırğızıstanın üzləşmiş olduğu mürəkkəb və həyəcanlı siyasi hadisələrin məntiqi nəticəsi olaraq, bu ölkə tərəfindən istək, niyyət olsa da, baş verənlər demokratik islahatların arzuolunan səviyyədə keçirilməsinə istər-istəməz ciddi maneələr yaradıb. Odur ki, bu gün ölkə demokratik institutların kifayət qədər möhkəmlənməsi üçün çox iş görməlidir və belə bir vəziyyət Avropa Şurasında qətiyyən tərəddüd yaratmamalıdır. Əksinə, məhz elə Avropa Şurası bu istiqamətdə Qırğız Respublikasına daha çox diqqət və dəstək göstərə bilər. Şura bu yolda səylərini əsirgəməməlidir. Əməkdaşlığın, tərəfdaşlığın daha ardıcıl şəkildə davam etdirilməsinə ehtiyac var. Niyyətlərini gerçəkləşdirə bilməsi üçün Qırğızıstana daha münasib şərait yaradılmalı, Qırğızıstan da Avropa Şurasının işində, komitələrinin fəaliyyətində intensiv əlaqələr yaradaraq daha yaxından iştirak etməlidir”, - deyə R.Hüseynov qeyd edib.
Qırğızıstanın demokratik dəyərlərə sadiqliyinə və fikir mübadilələrinə daim açıq olmasına, eləcə də dərin tarixi əsasları olması məsələsinə toxunan Rafael Hüseynov Qırğızıstan üzrə məruzəçilərin sələflərindən fərqli olaraq, hesabatlarını daha uğurlu nəticələrə çatdıracağına, Qırğızıstan-Avropa Şurası əlaqələri və demokratiya tərəfdaşlığının arzulandığı kimi irəliləyişinə töhfələrini verəcəklərinə inandığını bildirib.
Şəhla Ağalarova
AZƏRTAC-ın xüsusi müxbiri
Strasburq
Bölmənin digər xəbərləri
