AZƏRBAYCANLI GƏNCLƏR KOREYANIN TARİXİ, MƏDƏNİYYƏTİ, MİLLİ ADƏT-ƏNƏNƏLƏRİ İLƏ YAXINDAN TANIŞ OLMUŞLAR
Gənclər və İdman Nazirliyinin mətbuat xidmətindən AZƏRTAC-a bildirmişlər ki, Azərbaycan gənclərindən ibarət qrup Koreya Respublikasında səfərdə olmuşdur.
On gündən çox davam edən səfər zamanı ölkənin tarixi, mədəniyyəti və Seul şəhərinin əzəmətli yerləri ilə yaxından tanışlıq, Koreya ailəsində qonaq olmaq gənclərdə xoş təəssürat yaratmışdır.
Gənclər Azərbaycanın Koreyadakı səfirliyində, bu ölkənin Səhiyyə, Sosial Müdafiə və Ailə İşləri üzrə Nazirliyində, “Koreya Qaz” Dövlət Şirkətində maraqlı görüşlər keçirmiş, Budda məbədini, Tarix-diyarşünaslıq muzeyini ziyarət etmişlər.
Koreyada təhsil alan azərbaycanlı tələbələrlə görüşən səfər iştirakçıları ölkənin digər şəhərlərinə də baş çəkmişlər.
Bu layihə Prezident İlham Əliyevin Sərəncamı ilə təsdiq edilmiş Azərbaycan Respublikasının Gənclər və İdman Nazirliyi və Koreya Respublikasının Milli Gənclər Komissiyası arasında gənclər sahəsində əməkdaşlıq haqqında Anlaşma Memorandumuna əsasən həyata keçirilmişdir.
Bir qrup koreyalı gənc də qarşılıqlı olaraq, avqustun 12-dən 22-dək Azərbaycana səfər edəcəkdir.
######
Bölmənin digər xəbərləri
