AZƏRBAYCANLI PİANOÇUNUN İFAÇILIQ MƏHARƏTİ BERLİNDƏ DƏ ALQIŞLARLA QARŞILANMIŞDIR
Almaniya paytaxtının möhtəşəm “Gendarmenmarkt Konzerthaus” salonunda təşkil olunmuş konsertdə ifaçılar müasir bəstəkarların yeni əsərlərini ilk dəfə səsləndirmişlər.
Həmyerlimiz, hazırda Almaniyada yaşayan istedadlı pianoçu, Almaniya-Avstriya İncəsənət Xadimləri Cəmiyyətinin fəxri üzvü, Essen Musiqi Akademiyasının dosenti Elnarə İsmayılova konsertdə uğurla çıxış etmişdir. O, alman bəstəkarı Kristina Messnerin çağdaş klassik musiqi janrında bəstələdiyi doqquz fraqmentdən ibarət “Kassandra” əsərini eksperimental avanqard ifaçılıq üslubunda ustalıqla səsləndirmişdir. İncəsənət xadimləri, musiqi tənqidçiləri, dinləyicilər həmyerlimizin sənətkarlığını alqışlarla qarşılamış, ifaçılıq məharətini yüksək qiymətləndirmişlər.
Azərbaycan Musiqi Akademiyasının məzunu Elnarə İsmayılova 1998-ci ildən Almaniya-Avstriya İncəsənət Xadimləri Cəmiyyətinin üzvüdür. O, konsertlərdə və beynəlxalq klassik musiqi festivallarında korifey bəstəkarlarımız Qara Qarayevin, Fikrət Əmirovun, Arif Məlikovun əsərlərini dəfələrlə ifa etmişdir.
Bölmənin digər xəbərləri
