Bakı, 2 aprel (AZƏRTAC). “Azərpoçt” Məhdud Məsuliyyətli Cəmiyyəti yeni elektron məlumat bazasını formalaşdıraraq cəmiyyətin istifadəsinə təqdim etmişdir. İndeks və ünvanların axtarışı” adlanan bazanın artıq “Azərpoçt”un rəsmi internet səhifəsində (www.azerpost.az) yerləşdirilmişdir.

AZƏRTAC xəbər verir ki, bu barədə məlumat verən Rabitə və İnformasiya Texnologiyaları Nazirliyinin poçt sektorunun müdiri Novruz Məmmədov bildirmişdir ki, burada əsas məqsəd poçt məktubların göndərişində ünvanların və indekslərin düzgün yazılmasını təmin etməkdir. Əvvəllər bir çox hallarda vətəndaşlar indeksləri səhv yazırdı və bunun nəticəsində də məktublar təyinatı üzrə deyil, başqa yerlərə gedirdi. Bəzən indeks səhv yazılırdı və indeksə görə ünvan dəyişik düşürdü. Beləliklə də məktub 2 gün ərzində ünvanına yetişməli olduğu halda həftələrlə yubanırdı. Bu gün Azərbaycanda dövriyyədə olan məktubların 80-85 faizi hüquqi şəxslər tərəfindən göndərilir. Hüquqi şəxslər də ünvanlar, indekslərlə bağlı dəqiqləşmələr aparmaqda çətinlik çəkirdilər. Doğrudur, müəyyən vaxt itkisi ilə, sorğu-suallarla indeksləri öyrənə bilirdilər. Lakin bəzən bu indekslər də səhv olurdu. Yəni dolayısı ilə yeni yaradılan sistem hər bir insana imkan verir ki, Azərbaycanda fəaliyyət göstərən poçt filialları üzrə onun yerləşdiyi ünvanlar, onun tabeliyindəki poçt şöbələri, poçt şöbələrinin düzgün indeksləri üzrə zəruri məlumatları əldə edə bilsin və məktubları göndərməmişdən qabaq bu sistemdən dəqiq məlumatlardan istifadə etməklə zərflərin üstünü düzgün doldursun. Zərflər düzgün doldurulduqda da məktublar ünvanı üzrə dəqiq gedir və vaxtında da yetişir.

Sözügedən məlumat axtarış sisteminin çox sadə olduğunu önə çəkən N.Məmmədov demişdir ki, bu baza “Azərpoçt”un saytında “elektron xidmətlər” bölməsinin aşağısında yerləşdirilmişdir. Bazaya daxil olduqdan sonra Azərbaycanın elektron xəritəsi açılır: “Burada şəhər və küçə üzrə axtarış etmək mümkündür. Yəni əgər göndərdiyiniz ünvanın, küçənin adını bilirsinizsə, bu zaman onu qeyd etməklə indeksi əldə etmək mümkündür. Küçənin adını bilmədikdə belə, indeksi tapmaq mümkündür. Bu bazadakı elektron xəritəni yaxınlaşdırmaqda, küçənin üstünə gəlməklə onun adını öyrənmək mümkündür.

Beləliklə şəhərin adını, küçəni qeyd etdikdən sonra, avtomatik olaraq ünvanlar açılır və “siçan”ı bu ünvan nömrələrinin üzərinə vurmaqla indeksi öyrənmək olur.

Eyni zamanda elektron xəritədə avtomatik olaraq axtarılan ünvan göstərilir. Burada əsas məqsəd odur ki, bizim poçt xidmətindən istifadə edən istər hüquqi şəxslər, istərsə də fiziki şəxslər zərfləri göndərişə hazırlayarkən bu məlumatlardan istifadə edərək düzgün ünvan və indeksi göstərə bilsinlər.

Adətən poçt şöbələri məktubları ünvana görə deyil, indeksə görə çeşidləyir. Dünyanın hər bir yerində belədir. İndeksə görə çeşidləmə aparmaq daha rahatdır. Çünki bir poçt şöbəsinin ərazisində 10 küçə ola bilər. Bakı şəhərində 130 poçt şöbəsi vardır. Onların hərəsinin 10 küçəsinin hamısını da çeşidləyici yadda saxlaya bilməz. Amma indeksi yadda saxlamaq çətin deyil. İndeks həmin poçt şöbəsinin xidmət etdiyi ərazinin göstəricisidir.

Məsələn, AZ 1000. Bu zaman çeşidləyici AZ 1000 indeksinə aid olan məktubları seçir. AZ 1000-in özünün içərisində indeks üzrə küçələr də tapılır, qeyd olunur və həmin məktub rahatlıqla ünvanına çatdırılır”.

Sözügedən baza haqqında cəmiyyətin məlumatlandırılmasının vacib olduğunu vurğulayan N.Məmmədov əlavə etmişdir ki, “Azərpoçt” bu məlumatı vətəndaşlara tam ödənişsiz formada təqdim edir: “Bu xidmət insanlarımızın birbaşa rahatlığına, eyni zamanda poçt işçilərinin rahatlığına xidmət edir. İstifadəçilər vaxt itirmədən, ora-bura getmədən mənzillərində, öz kabinetlərində əyləşərək indeksi öyrənə bilərlər, həm də vətəndaşlar əvvəlki kimi poçt işçilərinin vaxtını almadan, onlara əlavə sual vermədən istədiyi məlumatı əldə edə bilirlər. Əslində poçt işçisinin birbaşa vəzifəsi deyil ki, hər kəsə göndərdiyi məktub üçün indeksi öyrənib söyləsin. Amma ümumi işin xətrinə müraciət daxil olanda onları izah edirdi. Lakin belə olanda da poçt işçisi əlavə vaxt itirirdi. Amma bu cür baza istifadəyə verildikdən sonra daha istifadəçilərin poçta gəlib indeks öyrənməsinə ehtiyac qalmır. İndi poçt işçisinə şübhəli olan indekslər də bu bazadan dəqiqləşdirilir”.