Toxumluq sahələrin aprobasiyasına başlanılıb
Bakı, 19 may, AZƏRTAC
Ölkəmizdə qeyri-neft sektorunun inkişafı istiqamətində həyata keçirilən məqsədyönlü tədbirlər çərçivəsində kənd təsərrüfatının strateji əhəmiyyət daşıyan sahələrindən biri olan toxumçuluğun inkişafı daim diqqət mərkəzində saxlanılır. Məhsul istehsalçılarının keyfiyyətli toxuma olan tələbatının yerli istehsal hesabına təmin olunması prioritet istiqamətlərdən biri kimi müəyyən edilmiş və bu istiqamətdə Kənd Təsərrüfatı Nazirliyi yanında Aqrar Xidmətlər Agentliyi (AXA) tərəfindən ardıcıl tədbirlər həyata keçirilir.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildirilib ki, “Elektron kənd təsərrüfatı” informasiya sistemində bəyanı təsdiqlənmiş toxumçuluq təsərrüfatlarının toxumluq əkin sahələrində aprobasiya prosesinə start verilib. Aprobasiya öncəsi hazırlıq mərhələsinin yekunlaşması ilə əlaqədar AXA-nın rəhbərliyi tərəfindən fermerlər və aprobatorlarla görüş keçirilib. Görüş zamanı aprobasiya prosesində şəffaflığın, operativliyin və keyfiyyət göstəricilərinin tam təmin olunması ilə bağlı müvafiq tapşırıq və tövsiyələr verilib. Bildirilib ki, cari ildən etibarən toxumçuluq sahəsində innovativ yanaşmalar tətbiq edilərək aprobasiya nəticələrinin sənədləşdirilməsi elektron qaydada həyata keçiriləcək.
Eyni zamanda, respublika üzrə fəaliyyət göstərən aprobatorların nəzəri biliklərinin artırılması və sahə işləri zamanı təhlükəsizlik qaydalarına düzgün əməl olunmasının təmin edilməsi məqsədilə təlimlər təşkil olunub. Təlimlər çərçivəsində “Aprobasiya prosesi zamanı texniki təhlükəsizlik qaydaları”, “Taxıl bitkilərinin xəstəlik və zərərvericiləri”, “Taxıl bitkilərinin əsas diaqnostik əlamətləri və aprobasiyanın aparılma qaydaları” mövzularında iştirakçılara ətraflı məlumat verilib. Təlimlər zamanı sahə işlərinin təhlükəsiz və effektiv təşkili prinsipləri də izah olunub.
Hazırda toxumluq arpa əkini sahələrinin aprobasiyası həyata keçirilir. Ümumilikdə isə cari ildə 47,3 min hektar toxumluq taxıl əkini sahəsində aprobasiya aparılması nəzərdə tutulur. Həmin sahələrin 13,6 min hektarını arpa, 33,7 min hektarını isə buğda əkinləri təşkil edir.
Qeyd edək ki, tarla aprobasiyasının əsas məqsədi toxumların sort və səpin keyfiyyətlərinin dövlət standartlarına uyğunluğunu müəyyənləşdirmək, eləcə də fermerlərin keyfiyyətli toxumla təminatına nail olmaqdır.
Bölmənin digər xəbərləri
