Azərbaycan millisinin fransalı məşqçisi: Hidayət Heydərov xüsusi xarakterə malik cüdoçudur
Paris, 5 oktyabr, AZƏRTAC
Komandanın liderlərindən biri olan Hidayət Heydərov 29 yaşında cüdoda əsas titulların hamısına sahibdir. O, 2024-cü ildə Avropa, dünya və Olimpiya çempionluğunu qazanaraq, tarixi uğura imza atıb.
AZƏRTAC xəbər verir ki, bu sözləri cüdo üzrə Azərbaycan millisinin fizioterapevti Morqan Selles Fransanın BFM telekanalına açıqlamasında deyib.
Fransalı mütəxəssis bildirib ki, Hidayət Heydərovu uzun illərdir tanıdığını və onun xüsusi xarakterə malik idmançı olduğunu bildirib.
Paris Olimpiadasında 73 kiloqram çəki dərəcəsində qızıl medal qazanan azərbaycanlı cüdoçu finalda fransalı Joan-Benjamin Qaba üzərində qələbə qazanmışdı.
Sellesin sözlərinə görə, Heydərov yarış zamanı təzyiqdən çəkinmir və böyük arenalarda mübarizə aparmaqdan əlavə motivasiya alır: “Onun cüdo üslubu daim hücum üzərində qurulub və idmançı sona qədər mübarizəni dayandırmır. Bunun bariz nümunəsi onun 2024-cü il dünya çempionatında son saniyələrdə geridönüş edərək qələbə qazanmasıdır”.
Mütəxəssis Heydərovu məşqlərə böyük həvəs göstərən, yüksək iş qabiliyyətinə malik idmançı kimi xarakterizə edib: “O, həm idman karyerasının, həm də şəxsi həyatının idarə olunması baxımından xüsusi diqqət tələb edən mürəkkəb xarakterli idmançıdır”.
Morqan Selles Azərbaycan millisinin digər üzvü, son Avropa çempionatında bürünc medal qazanan Turan Bayramov (66 kiloqram) haqında da danışıb: “Uzun müddət daha aşağı çəki dərəcəsində çıxış edən Bayramov çəki problemi səbəbindən kateqoriyasını dəyişmək məcburiyyətində qalıb. Fiziki hazırlıq prosesindən sonra yeni çəki dərəcəsində keçirdiyi ikinci yarışda gümüş, üçüncü startında isə Avropa çempionatının bürünc medalını qazanıb”.
Fransalı məşqçi Bayramovun məşqlərdəki fiziki gücünü də xüsusi qeyd edib. Onun sözlərinə görə, cüdoçu sparrinq zamanı komanda yoldaşlarını havaya qaldıraraq, böyük məsafəyə atır və onları yerə düşməzdən əvvəl saxlayır.
Bölmənin digər xəbərləri
