Baytarlıq xidmətlərinin gücləndirilməsi davam etdirilir
Bakı, 5 oktyabr, AZƏRTAC
Kənd Təsərrüfatı Nazirliyi (KTN) yanında Aqrar Xidmətlər Agentliyinin Heyvan Sağlamlığı və Baytarlıq Xidmətləri Mərkəzi tərəfindən ölkədə heyvan sağlamlığının qorunması, yoluxucu xəstəliklərin qarşısının alınması və baytarlıq xidmətlərinin səmərəliliyinin artırılması istiqamətində profilaktik tədbirlər ardıcıl şəkildə davam etdirilir.
KTN-dən AZƏRTAC-a bildirilib ki, “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı” çərçivəsində müəyyənləşdirilmiş prioritet istiqamətlərə uyğun olaraq, respublikanın müxtəlif rayonlarında epizootik sabitliyin qorunması və baytarlıq xidmətlərinin gücləndirilməsi məqsədilə kompleks tədbirlər həyata keçirilir.
Aparılan işlər çərçivəsində heyvanlar arasında yoluxucu xəstəliklərin profilaktikası məqsədilə peyvəndləmə tədbirləri genişləndirilir, immunoloji müdafiənin təmin olunmasına xüsusi diqqət yetirilir. Kütləvi vaksinasiya prosesinin baytarlıq-sanitariya baxımından əhəmiyyəti ilə bağlı heyvan sahibləri arasında maarifləndirmə işləri aparılır, vətəndaşlarla görüşlər keçirilərək xəstəliklərin vaxtında qarşısının alınması, profilaktik tədbirlərə əməl olunması və baytarlıq xidmətlərindən düzgün istifadə ilə bağlı tövsiyələr verilir. Eyni zamanda, heyvan saxlanılan ərazilərdə sanitar-gigiyenik vəziyyətin yaxşılaşdırılması və yoluxucu xəstəliklərin yayılma riskinin minimuma endirilməsi məqsədilə profilaktik dezinfeksiya tədbirləri həyata keçirilir.
Profilaktik tədbirlərin mühüm istiqamətlərindən biri də vaksinlərin saxlanma şəraitinə və “soyuq zəncir” sisteminin tələblərinə əməl olunmasına nəzarətdir. Bu məqsədlə özəl baytar mütəxəssislərinin istifadəsində olan soyuducu avadanlıqların vəziyyəti, vaksinlərin müvafiq temperatur rejimində saxlanılması və onların təhlükəsizliyinin təmin olunması yerində monitorinq edilir. Mütəxəssislər tərəfindən aparılan monitorinqlər mövcud vəziyyətin qiymətləndirilməsinə, aşkar edilən çatışmazlıqların vaxtında aradan qaldırılmasına və baytarlıq xidmətlərinin keyfiyyətinin yüksəldilməsinə imkan verir.
Bununla yanaşı, əhali arasında aparılan epizootoloji maarifləndirmə tədbirləri vasitəsilə heyvan sahiblərinin yoluxucu xəstəliklərin əlamətləri, onların qarşısının alınması, vaxtında baytarlıq xidmətinə müraciətin əhəmiyyəti və vaksinasiya tədbirlərinin rolu barədə məlumatlılığı artırılır.
Qeyd edək ki, profilaktik vaksinasiya, dezinfeksiya, “soyuq zəncir”ə nəzarət, monitorinq və maarifləndirmə tədbirlərinin kompleks şəkildə həyata keçirilməsi heyvan sağlamlığının qorunması ilə yanaşı, kənd təsərrüfatında dayanıqlı və təhlükəsiz istehsal mühitinin formalaşdırılmasına mühüm töhfə verir.
Bölmənin digər xəbərləri
