İDMAN
BAKI AVROPANIN ƏN GÜCLÜ VOLEYBOLÇULARINI QƏBUL EDİR
Yanvarın 5-də Bakı İdman-konsert Kompleksində qadınlar arasında voleybol üzrə olimpiya lisenziya turniri başlanacaqdır. Azərbaycan Voleybol Federasiyasının mətbuat xidmətindən AZƏRTAC-ın müxbirinə bildirmişlər ki, yanvarın 3-də Bakıya gələn Bolqarıstan, Rusiya, Polşa, Almaniya, Türkiyə komandaları, habelə Azərbaycan yığması artıq məşqlərə başlamışlar. Hollandiyalılar və italiyalılar isə yanvarın 4-də gələcəklər.
Turnirin açılışında Avropa Voleybol Federasiyasının və turnirin iştirakçıları olan ölkələrin milli voleybol federasiyalarının rəhbərləri də olacaqlar.
Turnir iştirakçıları iki qrupa bölünəcəklər. Yığma komandamız turnirin açılışı günü rusiyalılar ilə görüşəcək, sonra Polşa və Almaniya voleybolçuları ilə qarşılaşacaqdır. Digər qrupda yarımfinala çıxmaq uğrunda Hollandiya, Türkiyə, İtaliya və Bolqarıstan komandaları mübarizə aparacaqlar.
Yarımfinal oyunları yanvarın 9-da, final oyunu isə yanvarın 10-da keçiriləcəkdir.
2004-cü ilin Olimpiya oyunlarına lisenziyanı yalnız qalib komanda qazanacaqdır.