BAKI DÖVLƏT UNİVERSİTETİ AZƏRBAYCAN XALQ CÜMHURİYYƏTİNİN YADİGARIDIR

27.05.2004 [23:15]
Çap et
A⁺ A^-

Mayın 27-də Bakı Dövlət Universitetində tarix fakültəsinin magistrantları və gənc tədqiqatçıların Azərbaycan Xalq Cümhuriyyətinin 86-cı ildönümünə həsr olunmuş III elmi-praktik konfransı keçirilmişdir. AZƏRTAC-ın müxbiri xəbər verir ki, konfransı universitetin rektoru, AMEA-nın müxbir üzvü, professor Abel Məhərrəmov açaraq, iştirakçıları Respublika günü münasibətilə təbrik etmiş, elmi məclisin işinə uğurlar arzulamışdır. Natiq Azərbaycan Xalq Cümhuriyyətinin dövlətçilik tariximizdəki rolu və əhəmiyyətindən danışaraq vurğulamışdır ki, cümhuriyyətin ən böyük uğurlarından biri Bakıda universitetin yaradılması olmuşdur. Bu gün fəxrlə deyə bilərik ki, təhsil ocağımız ilk müstəqil dövlətimizin yadigarıdır və biz onun bütün ənənələrini layiqincə davam etdiririk.

Rektor müstəqilliyimizin bərpasında, yeni dövlətimizin qurulmasında və qorunmasında xalqımızın ümummilli lideri, dünya şöhrətli siyasi xadim Heydər Əliyevin misilsiz xidmətlərini diqqətə çatdırmışdır.

Sonra universitetin tarix fakültəsinin dekanı, Milli Məclisin deputatı, professor Yaqub Mahmudov “Azərbaycan tarixində Cümhuriyyət dövrü” mövzusunda məruzə ilə çıxış etmişdir. Natiq Respublika gününün tarixi əhəmiyyətindən danışaraq qeyd etmişdir ki, məkrli düşmənlərin min bir hiylələrinə baxmayaraq Xalq Cümhuriyyəti quruldu, az müddət ərzində dövlət rəmzləri, ordu, parlament yaradıldı. 23 ay yaşamasına baxmayaraq xalqımız müstəqilliyin dadını duydu, Şərqdə bir demokratik dövlət kimi öz varlığını sübut etdi.

Magistrantlar Ziyad Əmrahov “Azərbaycan Xalq Cümhuriyyəti dövlətçilik tariximizin parlaq səhifəsidir”, Gülnarə Səmədova “Azərbaycan Xalq Cümhuriyyəti dövründə ordu quruculuğu”, Təhminə Aslanova “1918-1921-ci illərdə Naxçıvan bölgəsində siyasi vəziyyət” mövzularında məruzələr etmişlər.

Universitetin tələbələri hazırladıqları bayram proqramı ilə çıxış etmişlər.

Konfrans öz işini bölmə iclaslarında davam etdirmişdir.