Bakı Nəqliyyat Agentliyinin təşəbbüsü ilə İctimai Nəqliyyat üzrə Beynəlxalq Assosiasiyanın iclası keçirilib
Bakı, 24 iyul, AZƏRTAC
COVID-19 pandemiyasından sonra ictimai nəqliyyatda mövcud vəziyyət və gələcək planları müzakirə etmək məqsədilə Bakı Nəqliyyat Agentliyinin (BNA) təşəbbüsü ilə İctimai Nəqliyyat üzrə Beynəlxalq Assosiasiyaya (UITP) üzv qurumların videokonfrans formatında görüşü keçirilib.
Agentlikdən AZƏRTAC-a bildirilib ki, təşkilatın Avrasiya Nümayəndəliyinin sədri, Mostransproekt Tədqiqat İnstitutunun baş direktoru Aleksandr Polyakovun moderatoru olduğu görüşdə Avropa, ABŞ, Kanada, Latın Amerikası və Avrasiya regionundan olmaqla ictimai nəqliyyat təşkilatlarının ümumilikdə 300-dən çox nümayəndəsi iştirak edib.
UITP-in baş katibi Məhəmməd Mezqani, eləcə də Azərbaycan, Böyük Britaniya, Fransa, Avstriya, İspaniya və Rusiyanın paytaxt şəhərlərinin ictimai nəqliyyatın tənzimlənməsinə məsul qurumlarının rəhbər şəxsləri təqdimatla çıxış ediblər. Pandemiya zamanı ictimai nəqliyyatın tənzimlənməsi və postpandemiya inkişaf planları üzrə təcrübələrini bölüşüblər.
Konfransda karantin dövründə və bundan sonra təhlükəsiz şəhər mobilliyi xidmətlərinin təmin edilməsi, sərnişin tələbatının idarə olunması və əməliyyatlarının planlaşdırılması, iqtisadi təsirlər və maliyyə cavabdehliyi, ictimai nəqliyyatın inkişaf perspektivlərinə dair məsələlər müzakirə edilib. Həmçinin postpandemiya dövründə ictimai nəqliyyatın və şəhər mobilliyinin təmin edilməsində prioritetlər, bu sahələrdə investisiyaların və dövlət dəstəyinin əhəmiyyəti nəzərdən keçirilib. Sərnişinlərdə ictimai nəqliyyata inamın bərpası, səfərlərin təhlükəsiz təşkilinə dair fikir mübadiləsi aparılıb. Postpandemiya dövründə ictimai nəqliyyat və şəhər mobilliyinin əhəmiyyəti nəzərə alınaraq qlobal iqtisadi çətinliklərə baxmayaraq, dövlətlərin bu sahəyə investisiya yatırımlarının davam etdiriləcəyi deyilib.
Çıxış edənlər pandemiya zamanı ictimai nəqliyyatın ön cəbhədə fasiləsiz çalışdığını bildiriblər. Bu isə dayanıqlı şəhər mühitinin formalaşması, iqlim dəyişikliyi ilə mübarizə, sağlam və aktiv həyat tərzinin təşviqi, yerli iqtisadiyyatın inkişafı baxımından mühüm rol oynayır. Qeyd olunanları nəzərə alaraq UITP tərəfindən “#bettermobility” aksiyasına başlanılıb. Hər kəs üçün əlçatan və rahat ictimai nəqliyyatın təmin edilməsini əsas götürərək Bakı Nəqliyyat Agentliyi də bu qlobal çağırışa qoşulduğunu bəyan edib.
Bakı Nəqliyyat Agentliyinin idarə heyətinin sədri Vüsal Kərimli pandemiya zamanı görülən işlər, dayanıqlı nəqliyyat sisteminin təşkili istiqamətində postpandemiya planları haqqında təqdimatla çıxış edib. Bundan əvvəl isə idarə heyətinin sədri 200-dən çox konfrans iştirakçısını Azərbaycan-Ermənistan sərhədində baş verən düşmən təxribatı barədə məlumatlandırıb. Bildirib ki, bütün dünyada, o cümlədən də Azərbaycanda pandemiyaya qarşı tədbirlər aparıldığı bir vaxtda Ermənistan ordusunun təxribatı heç bir beynəlxalq təşkilatın prinsip və dəyərlərinə uyğun gəlmir. Beynəlxalq hüququn prinsiplərinin pozulmasına yönələn bu təcavüz qətiyyətlə qınanmalı və pislənilməlidir.
Təqdimat zamanı Bakı Nəqliyyat Agentliyinin fəaliyyəti, pandemiya zamanı Azərbaycan hökumətinin gördüyü kompleks tədbirlər diqqətə çatdırılıb. Mövcud vəziyyətdə ölkədə iqtisadi sabitliyin saxlanılması, əhalinin sağlamlığının qorunması və sosial müdafiəsinin təminatı yönümündə zəruri addımların atıldığı vurğulanıb. BNA-nın COVID-19-la mübarizə istiqamətində tədbirlər, o cümlədən təhlükəsizlik, ictimai nəqliyyat əməliyyatları, pandemiyanın təsirləri, postpandemik əməliyyatlar barədə ətraflı məlumat verilib.
UITP-in baş katibi Bakı Nəqliyyat Agentliyinin təşəbbüsü ilə keçirilən görüşün əhəmiyyətini vurğulayıb. Görüşün səmərəli nəticələr verəcəyini qeyd edən baş katib COVID-19-un ictimai nəqliyyat sektoruna təsiri mövzusunda fikirlərini bölüşüb.
Bölmənin digər xəbərləri
