BAKIDA 20 YANVAR FACİƏSİNƏ HƏSR OLUNMUŞ “YARIMÇIQ QALMIŞ UÇUŞ” FOTOSƏRGİSİ AÇILMIŞDIR
Bakı, 18 yanvar (AZƏRTAC). Yanvarın 18-də Azərbaycan İstiqlal Muzeyində 20 Yanvar faciəsinin 20 illiyinə həsr olunmuş “Yarımçıq qalmış uçuş” adlı fotosərgi açılmışdır.
Tədbirdə Azərbaycanın dövlət himni səsləndirilmiş, şəhidlərin xatirəsi bir dəqiqəlik sükutla yad edilmişdir.
20 Yanvar Cəmiyyətinin, Qarabağ Müharibəsi Veteran Qadınlar Birliyi nümayəndələrinin, şəhidlərin ailə üzvlərinin, qanlı faciənin canlı şahidlərinin, Azərbaycan ordusu əsgərlərinin, C.Naxçıvanski adına hərbi liseyin kursantlarının iştirakı ilə keçirilən tədbirdə muzeyin direktoru Fəridə Şəmsi diqqəti 1990-cı ilin yanvarında baş vermiş hadisələrə yönəltmişdir. O, Kremldəki cinayətkar hakimiyyətin göstərişi əsasında və həmin dövrdə Azərbaycana rəhbərlik edənlərin satqınlığı nəticəsində sovet qoşunlarının Bakıda və Azərbaycanın başqa şəhərlərində törətdiyi qanlı qırğın barədə məlumat vermişdir.
Bildirilmişdir ki, 20 il bundan əvvəl xalqımızın başına gətirilmiş faciənin qurbanları bu gün də böyük ürək ağrısı ilə yad edilir.
F.Şəms demişdir ki, bugünkü sərgidə AZƏRTAC-ın Fotoinformasiya baş redaksiyasının mərhum baş redaktoru Oqtay Məmmədovun (Oqtay Aydınoğlu) 20 Yanvar hadisələrinə həsr edilmiş fotoşəkilləri nümayiş etdirilir. Bu qiymətli fotoları muzeyə tanınmış sənətkarın oğlu Aydın Məmmədov təqdim etmişdir. Sərgidə O.Aydınoğlunun faciəyə həsr edilmiş 20-dən çox fotoəsəri sərgilənir.
Qeyd olunmuşdur ki, 1977-ci ildə Azərbaycan Dövlət Bədən Tərbiyəsi İnstitutunu bitirən Oqtay Aydınoğlu 1990-cı ildən həyatını Azərbaycan Dövlət Teleqraf Agentliyi (AZƏRTAC) ilə bağlamışdır. 1998-ci ildən agentliyin Fotoinformasiya baş redaksiyasına rəhbərlik edirdi. Həmin illər ərzində Oqtay Aydınoğlu Azərbaycanda baş vermiş ən gərgin, ən mühüm hadisələrin təkcə canlı şahidi yox, həm də fotosalnaməçisi olmuşdur. Çünki o, ən qaynar nöqtələrdə, ən mühüm hadisələrlə bağlı çəkilişlər aparırdı.
Oqtay Aydınoğlu ümummilli lider Heydər Əliyevin, son illərdə isə Prezident İlham Əliyevin çoxsaylı xarici və ölkədaxili səfərlərində AZƏRTAC-ın fotomüxbiri kimi iştirak etmişdir.
Tədbirdə çıxış edən Milli Məclisin deputatları Elmira Axundova, Jalə Əliyeva, şəhid anası Bağda Allahverdiyeva, AZƏRTAC-ın müxbiri, şair Zərəngiz Mansurova və başqaları 1990-cı il yanvarın 20-də sovet rejiminin Azərbaycan xalqına qarşı vəhşilik aktı, öz konstitusion hüquqlarının bərqərar olunması tələbi ilə çıxış edən dinc və silahsız əhalinin, azadlığı, müstəqilliyi və ərazi bütövlüyü uğrunda mübarizə aparan vətəndaşların vəhşicəsinə gülləbaran edildiyini vurğulamışlar.
Natiqlər bu qanlı hadisələrə Azərbaycan xalqının ümummilli lideri Heydər Əliyevin təşəbbüsü ilə siyasi-hüquqi qiymət verildiyini qeyd etmişlər. Bildirilmişdir ki, Heydər Əliyev təhlükə və təqiblərə baxmayaraq, 1990-cı il yanvarın 21-də Azərbaycanın Moskvadakı daimi nümayəndəliyinə gələrək cəsarətlə sovet rəhbərliyinə, kommunist rejiminə qarşı etirazla dolu bəyanat səsləndirmişdir.
Çıxış edənlər 20 Yanvar faciəsi zamanı sovet qoşunları tərəfindən törədilmiş vəhşilikləri xatırlatmış, milli azadlıq yolunda şəhid olan qəhrəmanların xatirəsinin Azərbaycan xalqının yaddaşında əbədi yaşayacağını bildirmişlər.
Natiqlər 20 Yanvar faciəsini lentə alan Oqtay Aydınoğlunun foto sənətinə bütün varlığı ilə bağlı olduğunu vurğulamış və onun əsərlərinin təkcə respublika mətbuatında deyil, xarici informasiya agentliklərində də yer aldığını söyləmişlər.
Bildirilmişdir ki, 20 il bundan əvvəl baş verən bu amansız qırğını lentin yaddaşına köçürən Oqtay Aydınoğlu kimi vətənsevər oğullar həmin işi çox cətin vəziyyətdə həyata keçirmişlər.
O.Aydınoğlunun böyük ürəyə, tükənməz enerjiyə malik, əsl vətənpərvər bir insan olmasından danışan natiqlər qeyd etmişlər ki, tanınmış fotomüxbir xalqımız 20 Yanvar faciəsinin ildönümünü qeyd edən günü, Şəhidlər xiyabanında çəkiliş apardıqdan az sonra dünyasını dəyişmişdir. Oqtay Aydınoğlu ölümü ilə də bir daha torpağına, millətinə bağlılığını, əsl jurnalist olduğunu sübüt etmişdir.
Vurğulanmışdır ki, Oqtay Aydınoğlunun peşəkarlığı yüksək qiymətləndirilmiş, o, “Əməkdar mədəniyyət işçisi” fəxri adına və “Tərəqqi” medalına layiq görülmüşdür.
Əminliklə qeyd edilmişdir ki, mərhum sənətkarın arzuları bundan sonra doğmaları tərəfindən böyük həvəslə həyata keçiriləcəkdir.
Tədbir iştirakçıları sərgiyə böyük maraqla baxmışlar.
Sərgi yanvarın 25-dək davam edəcəkdir.
######
Bölmənin digər xəbərləri
