Bakıda İtaliyanın milli bayramı qeyd edilib
Bakı, 31 may, AZƏRTAC
İtaliyanın Azərbaycandakı səfirliyi ölkəsinin milli bayramı münasibətilə mayın 31-də rəsmi qəbul təşkil edib.
AZƏRTAC xəbər verir ki, qəbulda əvvəlcə Azərbaycanın və İtaliyanın dövlət himnləri səsləndirilib.
İtaliyanın Azərbaycandakı səfiri Auqusto Massari qəbulda çıxış edərək Azərbaycan ilə İtaliya arasındakı münasibətlərdən danışıb. Bildirib ki, son illər bir neçə qarşılıqlı yüksəksəviyyəli səfərlər bu münasibətləri daha da inkişaf etdirib. İki ölkə arasında ticarət dövriyyəsi ildən-ilə artır. Münasibətlər yalnız neft və qaz ilə məhdudlaşmır. Azərbaycanda italyan dilinə yüksək maraq var. İtaliyada azərbaycanlı turistlərin sayı ildən-ilə artır.
Səfir əmin olduğunu bildirib ki, iki ölkə arasında münasibətlər bundan sonra da inkişaf edəcək.
Energetika naziri Pərviz Şahbazov bayram münasibətilə İtaliya xalqını Azərbaycan Hökuməti adından təbrik edib.
Nazir iki ölkə arasındakı münasibətlərin inkişafından danışıb. Bildirib ki, Prezident İlham Əliyevin və birinci xanım Mehriban Əliyevanın İtaliyaya, İtaliya Prezidenti Sercio Mattarellanın isə Azərbaycana səfərləri bu əlaqələrin möhkəmlənməsində mühüm rol oynayıb. İtaliya Azərbaycanın əsas ticarət tərəfdaşıdır. Ötən il iki ölkə arasında ticarət dövriyyəsi daha da artıb. İtaliya ilə iqtisadi tərəfdaşlıq, ilk növbədə, enerji sahəsini əhatə edir. Lakin münasibətlər bununla məhdudlaşmır. Ölkələrimiz arasında bütün sahələrdə əlaqələr yüksək səviyyədədir.
Tədbir bədii hissə ilə davam edib.
Qəbulda rəsmi şəxslər, Milli Məclisin deputatları, xarici ölkələrin Bakıdakı səfirləri, beynəlxalq təşkilatların təmsilçiləri, kütləvi informasiya vasitələrinin, ictimaiyyətin nümayəndələri iştirak ediblər.
Bölmənin digər xəbərləri
