SİYASƏT
Bakıda Rumıniyanın milli bayramı münasibətilə rəsmi qəbul təşkil edilib
Bakı, 28 noyabr, AZƏRTAC
Noyabrın 28-də Rumıniyanın Azərbaycandakı səfirliyi ölkəsinin milli bayramı - Birlik Günü münasibətilə rəsmi qəbul təşkil edib.
AZƏRTAC xəbər verir ki, hər iki ölkənin dövlət himnləri səsləndirildikdən sonra səfir Dan Yanku ölkəsinin keçdiyi inkişaf yolu haqqında məlumat verib. Azərbaycan-Rumıniya münasibətlərinə toxunan diplomat ölkələrimiz arasında hərtərəfli əlaqələrin son illər sürətlə inkişaf etdiyini vurğulayıb. Azərbaycanın Rumıniyanın Cənubi Qafqazda ən böyük ticarət tərəfdaşı olduğunu deyən səfir yüksək səviyyəli qarşılıqlı səfərlərin hər iki ölkənin strateji əməkdaşlığının daha da inkişafına böyük töhfə verdiyini vurğulayıb. Ölkələrimiz arasındakı siyasi və iqtisadi əlaqələrin möhkəmlənməsindən məmnunluğunu diqqətə çatdıran diplomat münasibətlərimizin gələcəkdə daha sürətlə inkişaf edəcəyinə əmin olduğunu bildirib.
Rumıniya xalqını milli bayram münasibətilə Azərbaycan dövləti adından təbrik edən xarici işlər nazirinin müavini Xələf Xələfov ölkələrimiz arasında diplomatik əlaqələrin qurulmasının 25 illiyinin qeyd olunduğunu bildirib. X.Xələfov ötən 25 il ərzində əlaqələrimizin strateji tərəfdaşlıq səviyyəsinə yüksəldiyini söyləyib, bütün sahələri əhatə edən münasibətlərin dinamik inkişaf etdiyini deyib.
2018-ci ilin yanvarında iki ölkə arasında Hökumətlərarası Komissiyanın növbəti iclasının keçiriləcəyini deyən nazir müavini bu iclasın iqtisadi əlaqələrin inkişafına töhfə verəcəyini söyləyib.
X.Xələfov Rumıniyanın Ermənistan-Azərbaycan, Dağlıq Qarabağ münaqişəsinin həllində Azərbaycanın haqlı mövqeyini dəstəklədiyini bildirib.
Azərbaycanın energetika sahəsində əməkdaşlığın inkişaf etdirilməsində maraqlı olduğunu deyən nazir müavini humanitar münasibətlərimizin Azərbaycan-Rumıniya xalqlarının yaxınlaşmasına xidmət edəcəyini vurğulayıb.