BAKIDA YEM İSTEHSALI İLƏ ƏLAQƏDAR BEYNƏLXALQ SEMİNAR KEÇİRİLMİŞDİR

03.02.2006 [15:37]
Çap et
A⁺ A^-

Kənd Təsərrüfatı Nazirliyinin heyvandarlıq məhsullarının istehsalı, emalı, damazlıq işi və otlaqlar şöbəsindən AZƏRTAC-a bildirmişlər ki, Bakıda “Yem istehsalı və yemləmənin müasir metodları haqqında” ikigünlük elmi-praktiki konfrans keçirilmişdir.

Nazirliyin, ABŞ-ın Beynəlxalq İnkişaf Agentliyinin, Azərbaycan “Aqrobiznes” Şurasının və “ASENA” şirkətinin birgə keçirdikləri tədbirdə şöbə müdiri Çingiz Fərəcov ölkəmizdə heyvandarlıq və quşçuluq sahələrindəki vəziyyətlə əlaqədar məruzə etmişdir.

Tanınmış moskvalı yemşünas alimlərdən İvan Panin, Sergey Moloskin və Valeri Kryukovun məruzələri maraqla dinlənilmişdir.

Konfrans iştirakçıları “ASENA” şirkətində olmuş, təşkilatın istehsal etdiyi yem zavodu avadanlığı və qarışıq yemin keyfiyyəti ilə tanış olmuşlar.

Gürcüstan və Dağıstan sahibkarları yem zavodu avadanlığı almaq barədə “ASENA” şirkəti ilə müqavilə bağlamışlar.