BALAKƏNDƏ 20 YANVAR FACİƏSİ QURBANLARININ XATİRƏSİ ANILIR
Balakən, 14 yanvar (AZƏRTAC). Balakən rayonunda 20 Yanvar faciəsinin iyirminci ildönümü ilə bağlı silsilə tədbirlər davam edir.
Rayon icra hakimiyyətinin tədbirlər planına uyğun olaraq, hazırda idarə, müəssisə və təşkilatlarda, mədəniyyət evləri və kitabxanalarda anma mərasimləri, konfranslar, ədəbi-bədii gecələr keçirilir, ümumtəhsil məktəblərində inşa yazı, rəsm və şeir müsabiqələri təşkil olunur, sərgilər açılır, guşələr yaradılır, şəhidlərin əziz xatirəsi ehtiramla yad olunur.
Bundan əlavə, əhalinin yaxından iştirakı ilə yerlərdə iməciliklər keçirilir, “Şəhidlər xiyabanı”nda təmizlik və abadlıq işləri aparılır, səliqə-sahman yaradılır.
Yanvarın 16-da şəhərdəki 2 nömrəli orta məktəbdə 20 Yanvar şəhidlərinin xatirəsinə həsr olunmuş “dəyirmi masa” keçiriləcək, 3 nömrəli orta məktəbin idman zalında isə güləş üzrə turnirə start veriləcəkdir. Yanvarın 19-da rayonun bütün ümumtəhsil məktəblərində Qanlı Yanvar faciəsinə həsr edilmiş xüsusi dərslər keçiləcəkdir.
Yanvarın 20-də rayon ictimaiyyəti “Şəhidlər xiyabanı”nı ziyarət edəcək, məscidlərdə şəhidlərin ruhuna dualar oxunacaqdır. Saat 12.00-da rayonun şəhər, qəsəbə və kəndlərində 20 Yanvar şəhidlərinin xatirəsi bir dəqiqəlik sükutla yad ediləcəkdir.
Bölmənin digər xəbərləri
