Balakənin meyvə bağlarından indiyədək 2327 ton məhsul tədarük edilib
Balakən, 12 iyul, Mustafa Dadaşov, AZƏRTAC
Balakən rayonunun meyvə bağlarında məhsul yığımı davam edir. İndiyədək bağlardan 2327 ton məhsul tədarük olunub. Yığılan meyvələr arasında alma, armud, ərik, albalı, şaftalı, alça, gilas və giləmeyvələr üstünlük təşkil edir. Fındıq yığımına isə avqustda başlanılacaq.
Bu barədə AZƏRTAC-ın bölgə müxbirinə Balakən Rayon Statistika İdarəsindən məlumat verilib.
Bildirilib ki, hazırda rayonda meyvə bağlarının ümumi sahəsi 13 min 218,1 hektardır. Bu bağların 10 min 544,1 hektarını fındıq bağları təşkil edir. Cari ilin ötən dövründə 3,5 hektarda yeni meyvə bağları salınıb. Yeni salınan bağlara xurma, şaftalı və gilas ağacları əkilib.
Ötən il rayonun meyvə və giləmeyvə bağlarından 33 min 102,1 ton məhsul tədarük olunub. Yığılan məhsulun 15 min 220 tonu xurma, 6 min 231,4 tonu fındıq, 4 min 794 tonu alma, 3 min 622 tonu armud, qalanı isə digər meyvələr olub. Meyvə istehsalı əvvəlki illə müqayisədə 163,5 ton artıb.
Bölmənin digər xəbərləri
