İQTİSADİYYAT
“Barama İnkubasiya 2021” proqramı davam edir
Bakı, 9 mart, AZƏRTAC
Barama İnnovasiya və Sahibkarlıq Mərkəzinin “Barama İnkubasiya 2021” proqramı çərçivəsində 6 startap fəaliyyətini davam etdirir.
İnnovasiyalar Agentliyindən AZƏRTAC-a bildirilib ki, proqram çərçivəsində startap komandaları, mentorlar, potensial tərəfdaşlar arasında görüşlər baş tutur, əməkdaşlıqlar üçün danışıqlar aparılır.
“Barama İnkubasiya 2021” proqramının hədəfi yerli startapların sahibkarlıq biliklərini və bacarıqlarını zənginləşdirmək, mentor dəstəyi vermək, uğurlu biznes alətləri və vasitələri ilə məhsulunu daha tez inkişaf etdirmək metodları haqqında məlumatlandırmaq və dünya bazarına çıxış yollarını göstərməkdir.
Yanvarda start verilən proqram 6 ay davam edəcək və 2 hissədən ibarət olacaq: sahibkarlıq tədris planı və fərdi mentorluq sessiyaları; kovörkinq və əməkdaşlıq, fərdi mentorluq sessiyaları.
Proqram Azərbaycan və ingilis dillərində, onlayn və oflayn keçirilir.