Benilüks Azərbaycanlıları Konqresi Rotterdamda Müstəqillik Günü ilə bağlı tədbir keçirib
Paris, 30 may, AZƏRTAC
Rotterdam şəhərində Benilüks Azərbaycanlıları Konqresinin (BAK) qərargahında 28 May - Müstəqillik Günü münasibətilə tədbir keçirilib.
AZƏRTAC xəbər verir ki, tədbirdə Niderland Krallığında fəaliyyət göstərən diaspor assosiasiyalarının rəhbərləri, Azərbaycan icmasının üzvləri iştirak ediblər.
BAK-ın sədri Elsevər Məmmədov tədbiri giriş sözü ilə açıb. Vətənin azadlığı və bütövlüyü uğrunda canlarından keçmiş şəhidlərin ruhu bir dəqiqəlik sükutla yad edilib.
BAK-ın vitse-prezidenti Sima Cəfərova “Tariximizi öyrənirik” mövzusunda məruzə ilə çıxış edib. 1917-1920-ci illər ərzində cərəyan edən hadisələrdən, Azərbaycan Xalq Cümhuriyyətinin yaranmasından, onun 23 ay ərzində Azərbaycana verdiyi töhfələrdən danışıb. Azərbaycanı iki yerə bölən tarixi faktları xatırladaraq, onun bölgədə bir çox fəsad və narahatlıqlara səbəb olduğunu vurğulayıb.
Azərbaycan Xalq Cümhuriyyəti dövründə aparılan islahatlardan, onların nəticələrindən, ictimai-siyasi həyatda rolundan danışılıb. Həmin illərdə qurulan diplomatik əlaqələr, xalqın dirçəliş və tərəqqi proqramları, iqtisadi inkişaf planları Cümhuriyyətin əsas siyasəti olduğu bildirilib. Cümhuriyyət təsisçilərinin ölkədə təhsil sisteminə verdikləri önəmdən, gənclərin xaricə təhsil almağa göndərilməsindən bəhs olunub.
Tədbir məruzə ətrafında müzakirələrlə davam edib.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
