Bərdədə keçirilən imtahanda 1153 abituriyent iştirak edib
Bərdə, 20 avqust, AZƏRTAC
Dövlət İmtahan Mərkəzinin avqustun 20-də Bərdə şəhərində keçirdiyi I və IV ixtisas qrupları üzrə qəbul imtahanlarının ikinci mərhələsi başa çatıb.
Dövlət İmtahan Mərkəzinin Bərdə regional bölməsinin müdiri Eltun Süleymanov AZƏRTAC-ın bölgə müxbirinə bildirib ki, ümumilikdə 5 binada təşkil olunan imtahanlarda Bərdə, Beyləqan, Tərtər və Xocavənd rayonları üzrə 1153 abituriyentin iştirakı nəzərdə tutulub. İmtahanların təşkil edilməsi üçün 15 imtahan rəhbəri, 109 zal nəzarətçisi, buraxılış təşkil edən 10 əməkdaş və 5 bina nümayəndəsi ayrılıb.
Pandemiya şəraitinin tələblərinə əsasən imtahan keçirilən binaların qarşısında sırada gözləmək üçün nişanlayıcı xətlər çəkilib. İmtahan binasına buraxılış rejiminin növbə ilə - lazımi sosial məsafəni gözləməklə təşkil olunub. İştirakçıların yalnız tibbi maska ilə imtahan binasına daxil olmasına icazə verilib. Daxil olan iştirakçıların məsafədən ölçə bilən elektron termometrlə bədən hərarətləri yoxlanılıb, zəruri dezinfeksiyaedici vasitələrdən istifadə edilib.
İmtahanlar mövcud təlimata uyğun keçib və hər hansı qanun pozuntusuna yol verilmədən vaxtında başa çatıb.
Bölmənin digər xəbərləri
