BERLİNDƏ “AZƏRBAYCAN BƏSTƏKARI FİRƏNGİZ ƏLİZADƏNİN PORTRETİ” ADLI TƏQDİMAT MƏRASİMİ KEÇİRİLMİŞDİR
Martın 12-də isə Berlinin məşhur “Komische Oper” teatrının möhtəşəm salonunda “Dünya klassik musiqisinin yaradıcı korifeyləri” silsiləsindən “Azərbaycan bəstəkarı Firəngiz Əlizadənin Portreti” adlı təqdimat mərasimi təşkil olunmuşdur.
Tanınmış alman musiqişünası Martin Demmler mərasimdə Firəngiz Əlizadənin şəxsiyyəti və zəngin yaradıcılığı barədə xoş sözlər söyləmiş, Azərbaycan bəstəkarının çağdaş klassik musiqi yaradıcılığı sahəsində parlaq, görkəmli, dünya şöhrətli sənətkar olduğunu, onun klassik musiqi nümunələrinin bəstəkarın daxili zənginliyindən, xalqa və incəsənətə bağlılığından xəbər verdiyini dönə-dönə vurğulamışdır.
Almaniyanın adlı-sanlı musiqi kollektivləri mərasimdə bəstəkarın əsərlərini səsləndirmişlər.”Ensemble United Berlin” simfonik orkestri Firəngiz Əlizadənin “Oazis”,”Çarpazlaşma II” simfonik bəstələrini, Ksenya Lukiç (Serbiya), Yoriko İkea (Yaponiya), Klauas Şöpp (Almaniya) beynəlmiləl ifaçılar üçlüyü bəstəkarın “Üç akvarel” əsərini ifa etmişlər.
Mərasimdə iştirak edən incəsənət xadimləri, musiqi tənqidçiləri,
dinləyicilər həmyerlimizin musiqisini yüksək dəyərləndirmişlər.
Sonra Firəngiz xanım royal arxasında əyləşərək, “Fortepiano musiqisi” silsilə əsərlərini ifa etmiş, yaradıcılığının xalqımızın tarixi mədəni irsindən qaynaqlanması barədə şərhlər vermişdir.
Mərasimdə Azərbaycanın Almaniyadakı səfiri Pərviz Şahbazov iştirak etmişdir.
