BERLİNDƏ “YAŞIL HƏFTƏ” DEVİZİ ALTINDA BEYNƏLXALQ SƏRGİ-KONFRANS ÖZ İŞİNƏ BAŞLAMIŞDIR
AZƏRTAC-ın xüsusi müxbiri xəbər verir ki, iştirakçı ölkələr sərginin ilk günü pavilyonlara gələn minlərlə qonağı pulsuz olaraq qida məhsullarından hazırlanmış yemək və içki süfrələri arxasına dəvət etmişlər. Sərginin təşkilatçıları və iştirakçı ölkələrin rəhbər xadimləri isə “ümumi ənənəni pozaraq”, sərginin rəmzi kimi bokallarına spirtli içki əvəzinə süd məhsulları süzmüşlər.
Sərgi ilə yanaşı, keçirilən elmi konfransda genetik cəhətdən yararsız kənd təsərrüfatı, o cümlədən vəbalı heyvandarlıq məhsullarının istehlak və mübadilə bazarlarına yol tapmaması, cəmiyyət üçün təhlükə törədən qida məhsullarının tədavülünə qarşı aparılacaq ciddi mübarizənin yolları və perspektivləri diqqət mərkəzində olacaqdır.
Almaniya siyasi dairələrinin yekdil qənaətinə görə, Şərqi Avropa ölkələrinin yeni dəstəsinin Avropa Birliyinə inteqrasiyası və bir neçə aydan sonra Birliyin genişlənməsi ərəfəsində təşkil olunan sərgi-konfrans dünya ölkələrinin kənd təsərrüfatı və iqtisadiyyatının sağlamlaşdırılmasına öz müsbət təsirini göstərəcəkdir.
