Beynəlxalq birliyin fərqli münasibətləri Ermənistanın ziyanınadır
Bakı, 23 noyabr, AZƏRTAC
Bu günlərdə Tunisdə keçirilmiş Beynəlxalq Frankofoniya Təşkilatının 50 illik yubileyində Ermənistan xarici işlər nazirinin Azərbaycan əleyhinə sələndirdiyi bəyanat, əslində, bu ölkənin hələ də məğlubiyyətini həzm edə bilməməsi və “bəlkə də qaytardılar” xülyası ilə yaşamasından xəbər verir. Göründüyü kimi, Ermənistan hələ də təxribatlardan əl çəkmir, 2020-ci il 10 noyabr tarixli üçtərəfli Bəyanatın bəndlərini yerinə yetirmir, beynəlxalq hüququn normalarına yenə də hörmətsizlik edir. Bununla yanaşı, Azərbaycanla öz arasındakı dövlət sərhədlərinin delimitasiya və demarkasiya prosesinin başlanmasından, nəqliyyat və kommunikasiya əlaqələrinin bərpasından, həmçinin Zəngəzur dəhlizinin yaradılmasından boyun qaçırır. Bəzi beynəlxalq təşkilatların və ermənipərəst qüvvələrin havadarlığına güvənən Ermənistan müxtəlif bəhanələrlə sülh müqaviləsini imzalamaqdan boyun qaçırır. Ölkə rəhbərliyi hələ də dərk etmək istəmir ki, beynəlxalq birliyin postmüharibə dövründə də münasibətlərin tənzimlənməsinə fərqli münasibəti Ermənistanın ziyanınadır.
Bu fikirləri AZƏRTAC-a açıqlamasında siyasi şərhçi Əliqismət Bədəlov söyləyib.
Frankofoniya sammitindən bir qədər əvvəl qəbul edilmiş Fransa Senatının qərəzli qətnaməsini xatırladan Ə.Bədəlov deyib ki, özünü demokratiya və insan haqlarının müdafiəçisi kimi təqdim edən Fransa Senatı ikrah doğuran qətnaməsi ilə ölkəsini beynəlxalq aləmdə rüsvay etdi. Azərbaycandan öz silahlı qüvvələrini “suveren Ermənistan ərazisindən geri çəkməyi və Ermənistanın ərazi bütövlüyünə hörmət etməyi” tələb edən qətnamədə, həmçinin “erməni hərbi əsirlərin azad olunması, Azərbaycan rəsmilərinə məxsus aktivlərin hədəfə alınması, qaz nəqlinə embarqo tətbiq edilməsi, “Dağlıq Qarabağ Respublikasının” tanınması, eləcə də Ermənistanın müdafiə qabiliyyətinin yüksəldilməsində mümkün dəstəyin verilməsi” əksini tapıb.
Siyasi şərhçi bu tələbləri irəli sürən ermənipərəst Senata xatırladıb ki, Azərbaycan həmişə olduğu kimi, humanizm siyasətinə sadiqliyini bir daha nümayiş etdirərək, 12-14 sentyabr iğtişaşlarında əsir götürülmüş 17 erməni hərbçini Ermənistana təhvil verib. Buna qədər isə sentyabrın 8-də daha 5 erməni hərbçisi təhvil verilmişdi. Ümumiyyətlə, son vaxtlar Azərbaycan 133 erməni əsgər və zabitinin meyitini qarşı tərəfə təhvil verib. Təbii ki, ermənipərəst qüvvələrin bu humanizmi görməzliyə vurması və riyakarlığı postmüharibə dövründə Azərbaycanla Ermənistan arasında normallaşma prosesinə xələl gətirir, sülh müqaviləsinin imzalanmasına problem yaradır.
Ə.Bədəlov deyib ki, Fransa kimi ikili siyasət yürüdən və beynəlxalq hüququn normalarına açıq şəkildə hörmətsizlik edən Frankofoniya kimi qərəzli beynəlxalq qurumlar problem yaratmasalar, Ermənistan ilə Azərbaycan arasında siyasi dialoq tədricən sülh müqaviləsini yaxınlaşdırar. Bu il oktyabrın əvvəlində Cenevrədə Azərbaycan və Ermənistan xarici işlər nazirləri arasında ikitərəfli görüşün keçirilməsini də nəzərə alsaq, iki ölkə arasında birbaşa dialoq dinamikasının artması vəziyyətin getdikcə normallaşmasına ümid verirdi. Təəssüf ki, beynəlxalq birlik ikili standartdan hələ də əl çəkmir, postmüharibə dövründə də Ermənistanın beynəlxalq hüququn normalarını kobud şəkildə pozmasına laqeyd yanaşır, qərəzli qətnamələr qəbil etməklə bu ölkəni uçuruma aparır: “Əslində, münaqişənin güc yolu ilə həllini qaçılmaz edən də 30 il davam edən beynəlxalq riyakarlıq oldu. Əgər beynəlxalq təşkilatlar vaxtında Ermənistana törətdiyi cinayətlərə və beynəlxalq hüququn normalarını pozduğuna görə, sanksiyalar tətbiq etsəydilər, müharibənin başlanmasına ehtiyac da qalmazdı. Ancaq ikili standart mərəzindən əl çəkə bilməyənlər əsl həqiqəti söyləməyə cürət etmədilər”.
Siyasi şərhçi bir neçə gün əvvəl Beynəlxalq Frankofoniya Təşkilatının sammitində baş verənləri xatırladaraq deyib ki, əslində, bu sammit Ermənistan üçün “suda batan adamın saman çöpünə əl atması”na bənzəyir. Anti-Azərbaycan tezislər üzərində qurulmuş Frankofoniya qətnaməsi sammitdə Azərbaycanın mövqeyini müdafiə edən bir sıra, xüsusilə, Qoşulmama Hərəkatına üzv dövlətlər tərəfindən ciddi etirazla qarşılanıb və həmin tezislər sənəddən çıxarılıb. Prezident İlham Əliyev də sammitdə qəbul edilmiş qətnaməyə münasibət bildirərkən deyib ki, Frankofoniya təşkilatında olan dostlarımızın səyi nəticəsində bütün anti-Azərbaycan tezislər sənəddən çıxarılıb.
“Ermənistan və havadarları, nəhayət, dərk etməlidirlər ki, vəziyyətdən çıxış yolu sülh müqaviləsinin imzalanmasıdır. Beynəlxalq birliyin hələ də fərqli nümayişi Ermənistanın ziyanınadır və bu, ölkəni uçuruma aparır”, - deyə Ə.Bədəlov bildirib.
Bölmənin digər xəbərləri
