Bir il əvvəl qonaq kimi getdi, indi tələbə kimi qayıdır - Amal Mirzəyevin hekayəsi
Bakı, 25 avqust, AZƏRTAC
Bəzən bir səfər insanın qarşısına yeni bir yol aça bilər. Amal Mirzəyev üçün 2025-ci ildə Sidneyə etdiyi səfər də məhz belə olub. Elmi konfransda iştirak etmək üçün getdiyi şəhərdə Sidney Universitetini ziyarət edən Amal kampus, akademik mühit və tələbələr üçün yaradılan imkanlarla yaxından tanış olub. Həmin gün universitet haqqında formalaşan təəssürat bir il sonra onun qarşısında seçim etdikdə xüsusi əhəmiyyət daşıyıb.
2026-2027-ci tədris ili üzrə Dövlət Proqramının qaliblərindən biri olan Amal Mirzəyev indi təhsil yolunu məhz həmin universitetdə davam etdirəcək. Milli Aviasiya Akademiyasının kompüter mühəndisliyi ixtisası üzrə bakalavriat təhsilini bu il başa vuran Amal Avstraliyanın Sidney Universitetində kibertəhlükəsizlik ixtisası üzrə magistratura təhsili alacaq.
Onun bu mərhələyə qədər keçdiyi yol isə yalnız auditoriya və imtahanlardan ibarət olmayıb. Universitet illərində kibertəhlükəsizlik, informasiya texnologiyaları, süni intellekt və innovasiya sahələrində özünü inkişaf etdirən Amal müxtəlif yerli və beynəlxalq müsabiqələrdə, elmi konfranslarda və innovasiya proqramlarında iştirak edib, bir sıra platformalarda Azərbaycanı təmsil etmək imkanı qazanıb.
Dövlət Proqramının qalibi Amal Mirzəyev AZƏRTAC-a müsahibəsində qeyd edib ki, bakalavriat təhsilinin sonlarına doğru qarşısına yeni məqsəd qoyub - əldə etdiyi bilikləri daha da dərinləşdirmək və təhsilini dünyanın nüfuzlu universitetlərindən birində davam etdirmək.
“Əsas məqsədim dünyanın qabaqcıl universitetlərindən birində təhsil alaraq öz sahəmdə daha dərin bilik və beynəlxalq təcrübə qazanmaq idi. Dövlət Proqramının Azərbaycan gənclərinə dünyanın nüfuzlu universitetlərində təhsil almaq üçün yaratdığı geniş imkanları nəzərə alaraq magistratura planımı məhz bu proqram çərçivəsində həyata keçirmək əsas hədəflərimdən birinə çevrildi. Bu məqsədlə müxtəlif universitetləri və təhsil imkanlarını araşdırdım. Təhsil almaq istədiyim sahəni və universitetləri müəyyənləşdirib, qəbul tələblərini araşdırıb ingilis dili üzrə hazırlaşdım və tələb olunan sənədləri mərhələli şəkildə hazırladım. Nəticədə ABŞ-nin Karnegi Mellon Universiteti, Avstraliyanın Sidney Universiteti və Böyük Britaniyanın Mançester Universiteti də daxil olmaqla bir sıra nüfuzlu ali təhsil müəssisələrindən qəbul təklifləri əldə etdim. 2025-ci ildə elmi konfransda iştirak etmək üçün Sidney şəhərində olmuşdum. Həmin səfər zamanı Sidney Universitetini şəxsən ziyarət etmək imkanım oldu. Kampusu, akademik mühiti və tələbələr üçün yaradılan imkanlarla yaxından tanış oldum. Universitet məndə çox müsbət təəssürat yaratdı. Buna görə də son seçim qarşısında qalanda Sidney Universiteti mənim üçün artıq sadəcə internetdə araşdırdığım bir universitet deyildi. Orada olmuş, mühiti görmüş və özümü həmin akademik mühitdə təsəvvür edə bilmişdim”, - deyə Amal Mirzəyev qeyd edib.
Beləliklə, bir vaxtlar qısa səfər çərçivəsində ziyarət etdiyi universitet bu dəfə onun yeni təhsil ünvanına çevrilib. Sidney Universitetində kibertəhlükəsizlik ixtisası üzrə təhsil alacaq Amal üçün bu seçim həm də universitet illərində formalaşan maraqlarının davamıdır.
Amal Mirzəyev bu ixtisasa olan marağından danışır: “Kibertəhlükəsizliyi seçməyimin əsas səbəbi bu sahənin müasir dünyada sürətlə inkişaf etməsi və strateji əhəmiyyətinin artmasıdır. Rəqəmsallaşma həyatımızın bütün sahələrinə təsir etdikcə məlumatların, informasiya sistemlərinin və kritik infrastrukturların qorunmasına ehtiyac da artır.
Məni bu sahədə ən çox cəlb edən məqamlardan biri onun daim yenilənməsidir. Burada bir problemin həlli ilə hər şey bitmir. Yeni texnologiyalar, yeni təhdidlər və yeni yanaşmalar meydana çıxır. Bu da insanı daim öyrənməyə, araşdırmağa və özünü inkişaf etdirməyə vadar edir”.
İndi isə qarşıda yeni mərhələ dayanır. Magistratura təhsilindən sonra əldə etdiyi bilik və beynəlxalq təcrübəni Azərbaycanda tətbiq etmək istəyən Amal üçün rəqəmsal sistemlərin və kritik infrastrukturların təhlükəsizliyinin gücləndirilməsi əsas maraq istiqamətlərindən biridir. Bununla yanaşı, innovasiya və startap ekosisteminə də maraq göstərir. Gələcəkdə texnologiyayönümlü layihələr və startaplar üzərində çalışaraq ölkənin innovasiya ekosisteminin inkişafına töhfə vermək istəyir.
Xaricdə təhsil almaq istəyən gənclərə tövsiyəsi isə öz yolunda formalaşdırdığı prinsiplərlə səsləşir: “Ən əsası isə ilk uğursuzluqdan sonra dayanmaq olmaz. Mənim özüm üçün də əsas prinsiplərdən biri budur: alınmadısa, yenidən sına, yenə alınmadısa, başqa yol tap və bir daha sına”.
Müxbir - Nərmin Muradzadə
Bölmənin digər xəbərləri
