Bakı, 30 sentyabr, AZƏRTAC

Qarabağın dirçəlişi birliyimizdən və həmrəyliyimizdən keçir. Torpaqlarımız işğaldan azad ediləndən sonra, mənim də ən böyük arzularımdan biri gerçək oldu, doğma Zəngilanıma səfər edə bildim, ata-baba ocağımı ziyarət elədim, uşaqlığımın keçdiyi evi, həyəti, bağçanı gördüm. Daha doğrusu, bütün bunlardan qalanları. Dədə-baba yurdumun həsrəti ilə keçən bütün bu illər boyunca mən bu səhnəni təsəvvür etmişdim. Hər dəfə də təsəvvürümdə, o yerləri görəndə hönkür-hönkür ağlayacağımı görürdüm. Amma viran qoyulmuş, dağıdılmış, kol-kos basmış ata yurdumda mən ağlamadım. Əksinə, içimdə böyük bir sevinc, fərəh hissi vardı. Qələbə sevinci, o yerləri azad edə bilməyin sevinci, otuz ilə yaxın çəkən həsrətin bitməyinin sevinci... Amma məsələ təkcə bu da deyildi. Mənim sevincimin əsas səbəbi içimdəki inam idi. Bu torpaqların əvvəlkindən daha abad olacağına, viran qoyulmuş bütün el-obamızı yenidən və daha yaxşı qurub-yaradacağımıza olan sonsuz və sarsılmaz inam. Bu inam məni ağlamağa qoymurdu. Bu inam məni ucadan, fəxrlə, qürurla sevinməyə səsləyirdi.

Bu otuz ildə ermənilər yalnız bizim evə deyil, Qarabağ bölgəsinə külli miqdarda maddi ziyan vurublar.

AZƏRTAC xəbər verir ki, bu fikirləri Qarabağ Dirçəliş Fonundun Fandreyzinq və Kommunikasiya şöbəsinin müdiri Aybəniz İsmayılova ifadə edib. O qeyd edib ki, uzun müddət ərzində həmin zərərin miqyası erməni işğalçı qüvvələri tərəfindən gizlədilsə də, Müzəffər Ali Baş Komandan, Prezident İlham Əliyevin rəhbərlik etdiyi Azərbaycan Ordusunun Vətən müharibəsində qazandığı Zəfərdən sonra bu dəhşətli faktlar dünya ictimaiyyətinin diqqətinə çatdırılıb: “Foto və videolarda əks olunan görüntülər işğal edilmiş ərazilərə dəymiş zərərin miqyasının yalnız Birinci və İkinci Dünya müharibələrinin nəticələri ilə müqayisə edilə biləcəyini göstərir. Hazırda Azərbaycan Respublikası Prezidentinin tapşırığına əsasən Qarabağda şəhərlərin və digər yaşayış məntəqələrinin dağıdılması, onun zəngin təbii sərvətlərinin talanması və biomüxtəlifliyinin məhv edilməsi nəticəsində dəymiş maddi ziyanın ətraflı hesablanması həyata keçirilir. Bu işlər başa çatdıqdan və müstəqil ekspertlər tərəfindən təsdiqlənəndən sonra müvafiq materiallar Ermənistan tərəfi və onun ortaqlarına qarşı məhkəmə iddialarının əsasını təşkil edəcək. Düşmənin ölkəmizə, xalqımıza vurduğu zərərin miqyası böyük olsa da yaralarımızı sağaltmalı, gələcəyə baxmalıyıq. Bu gün dövlət olaraq, xalq olaraq qarşımızda yeni bir missiya dayanır - Vətənimizin ayrılmaz hissəsi olan Qarabağımızı bərpa etmək, dirçəltmək”.

Şöbə müdiri həmçinin qeyd edib ki, cəmiyyətin işğaldan azad edilmiş torpaqların bərpasına dəstək verməsi, bütün təbəqələrinin Qarabağa vurulan ziyanın həcmi barədə məlumatlandırılmasından birbaşa asılıdır: “Bu səbəbdən də Qarabağ Dirçəliş Fondunun fəaliyyətində xüsusi diqqət ermənilərin bu ərazilərdə apardıqları qeyri-qanuni fəaliyyətə və işğal nəticəsində Qarabağa dəyən zərərin geniş ictimaiyyətə çatdırılmasına verilir. Beləliklə bu məlumatların geniş ictimaiyyətə çatdırılması fondun işinin əsas qayələrindən birini təşkil edir.

Ermənilərin ölkəmizə vurduğu ziyan aşağıdakı qaydada qruplaşdırılır:

• Memarlıq abidələri və müqəddəs yerlərə dəyən maddi ziyan

• İnfrastruktur və binalara (yaşayış binaları, sosial və ticarət obyektləri, inzibati binalar və sair) dəyən ziyan

• Ekologiyaya dəyən zərər

• Qeyri-qanuni iqtisadi fəaliyyət və məskunlaşma siyasəti.

Eyni zamanda, ictimaiyyət münaqişənin səbəbləri, erməni işğalçı qüvvələrinin dinc Azərbaycan vətəndaşlarına qarşı törətdikləri cinayətlər barədə də məlumatlandırılır.

Qeyd etmək lazımdır ki, bu məlumatların yayılmasında “Karabakh.Center” platformasından fəal istifadə olunur.

Bəli, vətənpərvər oğullarımızın, qızlarımızın qanı, canı, fədakarlığı nəticəsində biz torpaqlarımızı azad etdik. Bizim vəzifəmiz, borcumuz isə bu azad olunan torpaqlarımızı dirçəltmək, yenidən çiçəklənən abad bir diyara çevirməkdir. Bu abadlıq işlərində də minlər, on minlərlə fədakar oğul-qızlarımız bizə qoşulacaq, əl-ələ verib Qarabağımızı birlikdə dirçəldəcəyik. Kimi biliyini, kimi fiziki gücünü, kimi də maddi resurslarını ortaya qoyacaq”, - deyə A.İsmayılova bildirib.

“Ötən tədbirlərdən birində Azərbaycanın iqtisadiyyat naziri Mikayıl Cabbarov gözəl bir fikir irəli sürdü. O dedi ki, Qarabağ məsələsi həmrəylik məsələsi olmalıdır. Qarabağ, onun azadlığı və abadlığı kimi işlər hər bir azərbaycanlının ortaq, birləşdirici ideyasına, dəyərinə, qırmızı xəttinə çevrilməlidir. Hətta vətənpərvərlik anlayışından da ayrılmalıdır.

Çünki Qarabağı sevmək, qorumaq, onun azadlığı üçün çalışmaq, abadlaşmasına yardım etmək məsələsinin vətənpərvər olub-olmamağa aidiyyəti yoxdur. Bir insan kifayət qədər vətənpərvər olmaya bilər. Ümumiyyətlə, vətənpərvər olmaya bilər. Hansısa bir azərbaycanlı xarici ölkədə rahat yaşaya bilər, övladlarını o ölkənin qayda və dəyərlərinə uyğun böyüdə bilər, hətta vətəni üçün darıxmaya da bilər. Amma bütün bunlar onu azərbaycanlı olmaqdan çıxarmamalıdır. Azərbaycanlı olmaq isə, Qarabağı dəyər hesab etməkdir, Qarabağ üçün köməyini əsirgəməmək, onun abadlığı, firavanlığı üçün əlindən gələni etməkdir.

Biz millət olaraq yeni bir dövrün astanasında dayanmışıq: bu dövrün adı dirçəliş, Qarabağla bağlı arzularımızı, xəyallarımızı gerçəkləşdirəcəyimiz dövrdür.

Qarşımızda dayanan məsələlərdən biri də azərbaycanlılar olaraq Qarabağımızı həmrəylik ideyamıza, dünyanın dörd bir tərəfində yaşayan soydaşlarımızı birləşdirən ortaq dəyərə, məfkurəyə çevirməkdir. Qarabağ təkcə torpaq deyil, coğrafi bölgü deyil, Qarabağ bizim tariximiz, mədəniyyətimiz, incəsənətimiz, musiqimiz, ədəbiyyatımız, maarifçiliyimiz, mədəni irsimizdir. Qarabağ bizim az qala bütün milli DNK-mızın, genetik kodlarımızın toplandığı, metafizik qavramdır.

Bəs sizin üçün Qarabağ nədir?

Qarabağ - Üzeyir musiqisi, Xurşidbanu Natəvan və Vaqif poeziyası, Haqverdiyevin, Nəcəf Bəy Vəzirovun irsi, Mir Mövsum Nəvvab, Həsən bəy Ağaoğlu maarifçiliyi, Qarabağ atçılığı, Qarabağ xalçaları, Qarabağ mətbəxi, Qarabağ təbiətidir. Bir anlığa təsəvvür edək ki, biz bütün bunları özümüzdən çıxarsaq, özümüzdən, bizi bir azərbaycanlı kimi formalaşdıran dəyərlərdən geriyə nə qalar?

Mən deyim. Biz azalarıq, mənən kasıblayarıq, çox rəngsiz, boz qalarıq. Qarabağ bizim mənəvi zənginliyimiz, rənglərimiz, mənəvi gücümüzdür. Qarabağ - bizim keçmişimizdən gələn qürurumuz, gələcəyimizin verdiyi böyük ümidlərdir.

Bu qürursuz, bu ümidlərsiz özümüzü təsəvvür etmək belə, necə də acı olardı. Buna görə də, dünyanın hansı ölkəsində, hansı şəhərində, kəndində yaşamağımızdan asılı olmayaraq ortaq dəyərimiz, ortaq arzularımız, ümidlərimiz Qarabağla bağlı olmalı, Qarabağa xidmət etməlidir.

Bir məkanı dəyərli edən, ona şərəf və ilahi ruh verən orada yaşayıb yaradan insanlardır. Nə qədər möhtəşəm binalar, saraylar inşa edərsəniz edin, əgər içində insan yoxdursa o sadəcə beton və dəmir yığınından başqa bir şey deyil. Millətimizin son fərdi, son nümayəndəsi son nəfəsini verməyənə qədər bu dəyərlər yaşayacaq, biz yaşadacağıq o dəyərləri.

Qarabağı dəyərli edən yalnız onun təbiəti, tikililəri, binaları və əşyaları deyil, həm də ona dəyər verən insanlarıdır. O insanlar ki, “Qarabağ mənim evimdir” deyərək yenidən ona sahib çıxacaq, ona yeni həyat verəcək, dirçəldəcək. Həmin insanlar bizik. Ən kiçiyimizdən ən yaşlımıza qədər. Çünki Qarabağ sevgisi yalnız bizim qəlbimizdə deyil, həm də damarlarımızdan axan qanımızda, ruhumuzdadır. Bu sevgidir bizi bir edən, həmrəy edən, güclü edən. Biz bu müqəddəs sevgi, amal ətrafında birləşib əl-ələ verərək doğma Qarabağımızı bərpa etməli, ona yeni həyat verməli, dirçəltməliyik. Çünki biz yalnız Qarabağın adi sakinləri deyil, həm də ona şərəf və ilahi ruh verənik.

Ürəkdən inanıram ki, biz bu müqəddəs missiyanın öhdəsindən ləyaqətlə, uğurla gələcəyik. Qarabağ bizim ümumi evimiz, məbədgahımız olmaqla yanaşı, həm də birliyimizin, həmrəyliyimizin, mübarizliyimizin, dirçəlişimizin rəmzi olacaq!”, - deyə şöbə müdiri fikrini yekunlaşdırıb.