Fərhad Məmmədov: Ermənistandakı seçkilər sülh gündəliyinə münasibətin göstəricisi olacaq
Bakı, 14 may, AZƏRTAC
Regionda davam edən siyasi proseslər və xüsusilə Ermənistanda baş verən daxili siyasi müzakirələr Cənubi Qafqazda sülh gündəliyinin gələcək taleyi baxımından mühüm əhəmiyyət daşıyır.
Bunu Beynəlxalq Münasibətlərin Təhlili Mərkəzində keçirilən dəyirmi masada çıxış edən politoloq Fərhad Məmmədov bildirib.
O, qeyd edib ki, bəzi xarici qüvvələr regionda açıq qalan məsələləri gələcəkdə öz geosiyasi maraqlarını təmin etmək üçün təsir aləti kimi saxlamağa çalışırlar.
“Bəzi dairələr regionda tam normallaşmanın baş verməsində maraqlı görünmür. Onlar müəyyən məsələləri gələcəkdə geosiyasi təsir vasitəsi kimi istifadə etmək niyyətindədirlər. Bu baxımdan, Ermənistanda gedən siyasi proseslər, orada aparılan siyasi müzakirələr və fikir toqquşmaları da xüsusi diqqətlə izlənilir.
Ermənistanda keçiriləcək parlament seçkiləri ölkəyə təqdim edilən sülh gündəliyinə münasibətin göstəricisi olacaq.
Bu seçkilər müəyyən mənada Ermənistan cəmiyyətinin sülh gündəliyinə münasibətinə referendum xarakteri daşıyır. Cəmiyyət bu gündəliyi qəbul edəcək, yoxsa etməyəcək – bu, yaxın illərdə regionda proseslərin hansı istiqamətdə inkişaf edəcəyinə ciddi təsir göstərəcək. Əgər razılaşdırılmış sülh gündəliyi Qərb ölkələri tərəfindən dəstəklənirsə, Ermənistan cəmiyyətinin verəcəyi qərar həm də həmin dairələrə cavab olacaq”, – deyə o qeyd edib.
Politoloq vurğulayıb ki, Azərbaycan tərəfi sülh gündəliyinin əsas müəllifi kimi bu prosesin irəliləməsi üçün ardıcıl addımlar atır.
“Azərbaycan həm sülh gündəliyinin müəllifi, həm də xoş niyyət nümayiş etdirən tərəf kimi indiyədək bütün imkanlardan istifadə edib ki, gələcəkdə regionda hansı imkanların yarana biləcəyini göstərsin. Bu günə qədər atılan addımlar da məhz sülh prosesinin möhkəmləndirilməsinə xidmət edib.
Azərbaycan əleyhinə müxtəlif platformalarda məqsədli informasiya kampaniyaları aparılır. Erməni diasporu, onları dəstəkləyən bəzi xarici dairələr, eləcə də müxtəlif ölkələrdəki müəyyən qüvvələr 44 günlük Vətən müharibəsi, 2023-cü ildə keçirilən antiterror tədbirləri və sonrakı proseslərlə bağlı təhrif olunmuş məlumatlar yaymağa çalışırlar. Prezident İlham Əliyev çıxışında bir daha vurğuladı ki, müharibənin necə aparılması məsələsi də beynəlxalq hüquq və humanitar prinsiplər çərçivəsində qiymətləndirilməlidir”, – deyə politoloq əlavə edib.
Bölmənin digər xəbərləri
