Elmir Babayev: Tədqiqatçı əvvəlcə layihəsi üçün hansı dəstəyə ehtiyac olduğunu müəyyənləşdirməlidir
Bakı, 30 sentyabr, AZƏRTAC
Elmi ideyanın həyata keçirilməsində maliyyələşmə mühüm amillərdən biridir. Lakin hər qrant imkanının hər bir tədqiqatçı üçün uyğun olmadığını nəzərə almaq və ilk növbədə layihənin məqsədini dəqiq müəyyənləşdirmək vacibdir.
Bunu AZƏRTAC-a açıqlamasında AMEA Gənclər Akademiyasının sədri dosent Elmir Babayev deyib. Onun sözlərinə görə, tədqiqatçı əvvəlcə layihəsi üçün hansı dəstəyə ehtiyac olduğunu müəyyənləşdirməlidir: eksperiment üçün avadanlıq və materialların alınması, xarici laboratoriyada təcrübə keçilməsi, yoxsa beynəlxalq tərəfdaşlarla birgə araşdırmanın həyata keçirilməsi.
Müsahibimiz qeyd edib ki, “Horizon Europe” proqramı və “EU Funding & Tenders Portal” Avropa tədqiqat və innovasiya çağırışlarını izləmək üçün əsas mənbələrdəndir. ERC, Mariya Sklodovska-Küri proqramı, eləcə də COST, TWAS və DAAD imkanları məqsəd və müraciət şərtlərinə uyğun olaraq ayrıca araşdırılmalıdır. Proqramın, maliyyələşdirən qurumun və elan portalının fərqli funksiyaları var. Onların adlarını bilmək uyğun çağırışı müəyyənləşdirməyin yalnız başlanğıcıdır. Axtarışı yalnız yaxın son müraciət tarixlərinə yönəltmək hazırlıq üçün mövcud vaxtı azalda bilər. Uyğun proqramın əvvəlcədən müəyyənləşdirilməsi tədqiqatçıya layihə ideyasını dəqiqləşdirmək, qəbul edən laboratoriya ilə əlaqə yaratmaq və tələb olunan sənədləri hazırlamaq üçün daha geniş imkan verir. Buna görə tədqiqatçının şəxsi təqvimində yalnız son müraciət tarixi deyil, layihənin hazırlanması ilə bağlı mərhələlər də qeyd olunmalıdır.
AMEA Gənclər Akademiyasının sədri diqqətə çatdırıb ki, hər bir elanda müraciətin fərdi, yoxsa institusional olması, namizədin karyera mərhələsi, ölkə və qəbul edən təşkilatla bağlı şərtlər, dəstəklənən fəaliyyət istiqamətləri və son müraciət tarixi diqqətlə yoxlanılmalıdır. Elanın qısa xülasəsi maraqlı görünsə də, yekun qərar rəsmi çağırış sənədinə əsasən verilməlidir.
E.Babayev Azərbaycan Elm Fondu, Elm və Təhsil Nazirliyi və digər aidiyyəti qurumların rəsmi elanlarının da mütəmadi izlənilməsinin vacibliyini qeyd edib. Onun sözlərinə görə, təhsil, tədqiqat, mobillik və gənclər layihələrinə göstərilən dəstəyin məqsədləri fərqli olduğundan konkret proqramın tədqiqat ehtiyacına uyğunluğu ayrıca qiymətləndirilməlidir. Karyera imkanları bacarıq planının formalaşdırılmasına kömək edir. Elmi karyera yalnız akademik vəzifədə yüksəlişlə məhdudlaşmır. Xarici laboratoriyada iş, postdoktorantura, qısamüddətli elmi səfər və beynəlxalq birgə layihələr tədqiqatçının metodoloji təcrübəsini və əməkdaşlıq imkanlarını genişləndirə bilər. EURAXESS, “Nature Careers”, “Science Careers” və “Academic Positions” kimi platformalar elmi karyera imkanlarının axtarışı üçün başlanğıc nöqtəsi kimi istifadə oluna bilər. Vakansiyaları yalnız iş axtararkən oxumaq onların faydasını məhdudlaşdırır. Gənc alim uyğun elanlarda təkrarlanan metod, proqram təminatı, dil və layihə idarəetməsi tələblərini qeyd etməklə öz inkişaf planını formalaşdıra bilər. Maraq göstərilən laboratoriyaların elanlarında müəyyən analiz üsuluna tez-tez rast gəlinirsə, həmin üsulun öyrənilməsi növbəti təlim məqsədinə çevrilə bilər.
“Belə yanaşma ümumi şəkildə “bacarıqlarımı artırmalıyam” niyyətindən daha praktikdir. Tədqiqatçı hansı bacarığı, hansı resursdan istifadə etməklə və hansı müddətdə inkişaf etdirəcəyini əvvəlcədən müəyyənləşdirir. Bununla yanaşı, seçilən imkanın tədqiqat mövzusuna uyğunluğu, rəhbərlik mühiti və gözlənilən elmi nəticə də nəzərə alınmalıdır”, – deyə E.Babayev bildirib.
Müxbir - Tünzalə Arazlı
Bölmənin digər xəbərləri
