Dünya çempionu olan millinin baş məşqçisi: Azərbaycan çimərlik güləşində iddialı ölkələrdən biridir
Bakı, 30 sentyabr, AZƏRTAC
Şükürlər olsun ki, bütün çəkilərdə medal qazandıq.
AZƏRTAC xəbər verir ki, bu sözləri sentyabrın 26-27-də Yunanıstanın Katerini şəhərində keçirilən çimərlik güləşi üzrə Dünya Seriyasının final mərhələsində uğurla çıxış edən Azərbaycan milli komandasının baş məşqçisi Oyan Nəzəriani deyib.
O bildirib ki, komanda yarışa ciddi hazırlıqla qatılıb və qarşıya qoyulan məqsədlərə nail olub: “Çox güclü yarış oldu. Çoxlu sayda iştirakçı var idi. Keçən ilin final mərhələsindən sonra iki qızıl medal qazanmışdıq. Elə həmin yarışdan qayıdandan sonra burada söz verdik ki, gələn il 4 çəkidə iştirak edəcəyik və komanda şəklində iddiamızı ortaya qoyacağıq. Bütün çəkilərdə medal qazanıldı. İki qızıl və iki bürünc medal oldu və komanda hesabında dünya çempionu olduq”.
Mütəxəssis Azərbaycanın çimərlik güləşində iddialı ölkələrdən biri olduğunu vurğulayıb: “Azərbaycan Güləş Federasiyasının bizə verdiyi dəstək danılmazdır. Vaxtaşırı təşkil edilən yüksəksəviyyəli təlim-məşq toplanışları və müxtəlif yığmaların ölkəmizə dəvəti bizim üçün çox faydalı oldu. İlk dəfə ölkəmizdə çimərlik güləşi üzrə U-17 dünya çempionatı və böyüklər arasında Dünya Seriyasının 4-cü mərhələsinin keçirilməsi xal ehtiyatımızı artırdı”.
“Final günü, yəni sentyabrın 27-si Anım Gününə təsadüf edirdi. Bayrağımızı qarşımıza qoyduq və yarışın başladığı gün danışdıq ki, şəhidlər bu millət üçün canlarından keçiblər, biz də bu xalqa borcluyuq. Tələbələrimizə dedim ki, axıra qədər mübarizə aparaq, millətimizi sevindirək. Şükürlər olsun ki, elə də oldu”, - deyə o bildirib.
Dünyanın ən yaxşı məşqçisi seçilən Oyan Nəzəriani bunun sevindirici hal olduğunu söyləyib: “Mükafatı alanda da dedim ki, bu mənim üçün həm də komanda uğurudur. Çünki heç bir şəxs təkbaşına böyük uğurlar qazana bilməz”.
Dünya çempionu Vüsal Əliyev qazandığı qələbəni şəhidlərimizə həsr etdiyini vurğulayıb: “Bu yarışa çox yaxşı hazırlaşmışdıq. Məşqçilərimizin rəhbərliyi altında 5 təlim-məşq toplanışı keçdik. Bildiyiniz kimi, ötən il də dünya çempionu olmuşdum. Titulu qoruyub saxlamağı bacardım. Çox sevincliyəm. Qələbəmi şəhidlərimizə həsr edirəm”.
Dünya Seriyasının digər qızıl medalçısı Əşrəf Aşırov isə çimərlik güləşində qazandığı uğurun komandanın məşqçilərinin düzgün yanaşmasının nəticəsi olduğunu bildirib: “Çimərlik güləşinə başlayanda məni burada nələrin gözlədiyini bilmirdim. Ancaq yığma komandanın məşqçilərinin iş planını, sistemini və yanaşmalarını gördükdən sonra onlara və uğur qazanacağıma inandım. Dünya Seriyasının 5 mərhələsindən 4-də qızıl medal qazandım. Gələn ilin planını bilmirəm. Hazırda qarşıdan gələn Azərbaycan çempionatına köklənirik. Ondan sonrasını zaman göstərəcək”.
Qeyd edək ki, sentyabrın 26-27-də Yunanıstanın Katerini şəhərində keçirilmiş Dünya Seriyasının final mərhələsində Vüsal Əliyev və Əşrəf Aşırov birinci, Camal Feyziyev, Sahib Dadaşov və Rübail İbrahimli isə üçüncü yeri tutublar. Azərbaycan millisi ilk dəfə komanda hesabında dünya çempionu olub.
Bölmənin digər xəbərləri
